Fjölskyldudagskrá
Harpa leggur ríka áherslu á barna- og fjölskyldumenningu og býður upp á fjölskyldudagskrá sem er aðgengileg öllum börnum, gestum að kostnaðarlausu.
Harpa leggur ríka áherslu á að skapa aðgengilega og fjölbreytta menningarupplifun fyrir börn og fjölskyldur. Markmiðið er að öll börn upplifi að þau eigi sér stað í Hörpu, óháð aldri, uppruna, tungumáli eða þörfum, og fái tækifæri til að njóta lista og menningar, taka þátt og skapa.
Í dagskrárgerðinni er lögð áhersla á þátttöku, sköpun, fræðslu og fjölbreytni. Viðburðir eru hannaðir með ólíka aldurshópa og fjölskyldur í huga og skapa vettvang þar sem ólík menning, tónlist og listgreinar mætast í opnu og aðgengilegu umhverfi.
Fjölskyldudagskrá Hörpu eykur aðgengi að menningu fyrir alla. Meðal annars með því að bjóða upp á fjölbreytta dagskrá sem er aðgengileg sem flestum, stuðla að þátttöku barna úr ólíkum samfélagshópum og vinna með samstarfsaðilum að því að skapa upplifun sem höfðar til fjölbreytts hóps gesta.
Dagskrá starfsársins 2026-2027
Börn eiga heima í Hörpu. Markmið fjölskyldudagskráar Hörpu er að skapa vettvang þar sem öll börn og fjölskyldur geta notið menningar, tekið þátt og upplifað listir saman, óháð aldri, uppruna, tungumáli eða þörfum.
Á komandi starfsári verður lögð áhersla á lifandi og fjölbreytta fjölskyldudagskrá þar sem tónlist, sköpun og þátttaka eru í forgrunni. Dagskráin býður upp á fjölbreytta viðburði fyrir börn á öllum aldri og fjölskyldur þeirra og spannar ólíkar tónlistarstefnur, menningarheima og listform.
Lögð verður sérstök áhersla á að skapa viðburði þar sem börn og fullorðnir geta notið menningar saman, auk þess sem áfram verður unnið með leik-, grunn- og tónlistarskólum, listafólki og öðrum samstarfsaðilum að fjölbreyttum verkefnum yfir starfsárið.
Markmiðið er áfram að gera Hörpu að opnum og lifandi samkomustað þar sem fjölskyldur geta hist, upplifað og skapað saman.
Viðburðir eru tvisvar í mánuði fyrir börn og fjölskyldur. Allir viðburðir eru ókeypis og öll hjartanlega velkomin.
Fjölskyldudagskrá Hörpu
Viltu leika á langspil? 6 ára og eldri
Hvernig hljómar langspil – og hvernig er eiginlega spilað á það? Í þessari skemmtilegu langspilssmiðju leiðir Eyjólfur Eyjólfsson börn og foreldra inn í heim langspilsins. Þátttakendur læra undirstöðuatriðin í langspilsleik og fá sjálfir að spreyta sig á þessu einstaka íslenska hljóðfæri. Á leiðinni kynnast þátttakendur sögu langspilsins og hlutverki þess í gamla bændasamfélaginu og baðstofumenningunni. Kennd verða valin lög úr þjóðlagasafni sr. Bjarna Þorsteinssonar og í lok smiðjunnar fá þátttakendur að flytja lögin saman á langspil. Langspilið hefur nú eignast sinn stað í Hljóðhimnum, upplifunarrými fyrir börn og fjölskyldur í Hörpu, þar sem gestir geta kynnst hljóðfærinu og prófað það sjálfir. Smiðjan er hugsuð fyrir börn og foreldra til að taka þátt saman.
Sögustund með Maxímús 3-12 ára
Kíktu í heimsókn til Maxímúsar Músíkúsar, knáu litlu músarinnar sem býr í Hörpu og elskar tónlist! Í þessari klassísku sögustund er sagan um Maxímús músíkús, eftir Hallfríði Ólafsdóttur, lesin fyrir börnin og fallegum myndskreytingum Þórarins Más Baldurssonar varpað á skjá. Börnin fylgja Maxímúsi á ævintýrum hans og kynnast töfrandi heimi tónlistarinnar í gegnum söguna. Boðið verður upp á tvær sögustundir á íslensku og íslensku táknmáli og á pólsku. Notaleg og skemmtileg stund fyrir alla fjölskylduna í félagsskap einnar þekktustu músar Hörpu!
VÆB í Hörpu
VÆB-bræður mæta í Hörpuhorn með fjölskylduvæna tónleika þar sem stuð og stemning verða í fyrirrúmi! Bræðurnir Hálfdán Helgi og Matthías Davíð Matthíassynir skipa dúettinn VÆB, sem hefur vakið mikla athygli fyrir kraftmikla tónlist, húmor og líflega sviðsframkomu. Árið 2025 kepptu þeir fyrir Íslands hönd í Eurovision með laginu RÓA. Á tónleikunum í Hörpu verður boðið upp á sannkallað VÆB fyrir alla fjölskylduna – hressandi tónlist, góða stemningu og nóg af stuði.
Ljóð fyrir framtíðina. Fyrir 5-15 ára
Hvernig hljómar framtíðin þegar börn fá að yrkja um hana? Í Ljóðum fyrir framtíðina mætast ljóð, tónlist og myndlist í dagskrá þar sem sköpunarkraftur barna er í aðalhlutverki. Barnakórar og söngvarar flytja ný og eldri verk eftir íslensk og norræn tónskáld við ljóð barna. Krakkar stíga einnig sjálf á svið og lesa upp eigin ljóð og myndverkum þeirra verður varpað á skjá meðan á tónlistarflutningnum stendur. Fjölbreytt og skapandi stund þar sem raddir, hugmyndir og listsköpun barna fá að njóta sín – og framtíðin er þeirra að túlka.
Baby Rave. Fyrir allan aldur
Dans, tónlist og samvera fyrir alla fjölskylduna! Baby Rave er dansviðburður fyrir börn á öllum aldri og fjölskyldur þeirra þar sem allir eru velkomnir. Börnin kynnast danstónlist frá ýmsum heimshornum og með hjálp ímyndunaraflsins ferðast þátttakendur um heiminn á dansgólfinu. Markmiðið er að skapa öruggt og opið rými þar sem börn og fullorðnir geta dansað, leikið sér og átt góða stund saman – hvert á sinn hátt. Um leið er sáð fræjum fordómaleysis og lögð áhersla á frelsi, fjölbreytileika og gleði. Komdu með fjölskylduna og slepptu þér á dansgólfinu í skemmtilegu og vingjarnlegu rave-i fyrir allar kynslóðir!
Dimmalimm
Sagan um Dimmalimm prinsessu og svaninn hefur fylgt íslenskum börnum í kynslóðir. Að þessu sinni er sagan sögð með tónlist Atla Heimis Sveinssonar í útsetningu Þórðar Magnússonar. Píanókvartettinn Negla flytur tónlistina ásamt söngkonunni Sigríði Ástu Olgeirsdóttur og saman leiða þau áheyrendur inn í fallegan ævintýraheim Dimmalimm. Falleg og notaleg tónlistarstund fyrir fjölskylduna þar sem ein ástsælasta barnasaga Íslands fær að hljóma á nýjan hátt.
Jólastund fjölskyldunnar í Hörpu - Allur aldur
Harpa býður börnum og fjölskyldum í hlýlega og notalega jólastund í Hörpuhorni. Boðið verður upp á jólatónlist, jólaföndur og dansað verður í kringum jólatréð. Auðvitað lætur Maxímús Músíkús sig ekki vanta og mætir í jólaskapi – og hver veit nema jólasveinninn kíki líka! Opið hús er frá kl. 11:00–14:00 og gestir geta komið og farið þegar þeim hentar. Komið og eigið notalega jólastund saman í Hörpu!
Vetrarsólstöðutónleikar. Allur aldur
Á vetrarsólstöðum er stysti dagur ársins. Í Reykjavík kemur sólin upp um kl. 11:21 og dagsbirtan varir aðeins í rétt rúmar fjórar klukkustundir. Við ætlum að njóta þess að fylgjast með sólinni koma upp yfir borginni og hlusta á fallega tónlist leikna á hörpu og fiðlu af Katie Buckley og Sigrúnu Harðardóttur. Gestir geta komið sér vel fyrir á stólum, mottum eða púðum – eða jafnvel lagst á gólfið, lokað augunum og hlustað. Tónleikarnir eru hugsaðir sem róleg stund í skammdeginu, þar sem fjölskyldur geta staldrað við, hlustað og notið augnabliksins saman. Notaleg stund fyrir hugann rétt fyrir jólin, þegar daginn tekur loks að lengja á ný.
Barnatónleikar með Lúðrasveit Verkalýðsins
Lúðrasveit Verkalýðsins býður börnum og fjölskyldum í fjöruga tónleika þar sem leikin verða skemmtileg barnalög, tónlist úr sjónvarpsþáttum og kvikmyndum og fleiri lög sem margir þekkja. Á tónleikunum fá gestir að kynnast ólíkum hljóðfærum lúðrasveitarinnar og heyra hvernig þau hljóma hvert fyrir sig og öll saman. Það verður nóg af stuði og stemningu þegar Flói fyllist af kröftugum tónum Lúðrasveitar Verkalýðsins!
Krakkarökkur. Allur aldur
Krakkarökkur er samstarfsverkefni Myrkra músíkdaga og Fjölskyldudagskrár Hörpu þar sem börnum og fjölskyldum er boðið að kynnast spennandi heimi nýrrar og samtímatónlistar. Myrkir músíkdagar eru árleg tónlistarhátíð þar sem ný og framsækin tónlist er í forgrunni og verk eftir íslensk og erlend tónskáld fá að hljóma. Á Krakkarökki verður boðið upp á tónleika sérstaklega ætlaða börnum og fjölskyldum. Nánari dagskrá og upplýsingar um flytjendur verða auglýstar þegar nær dregur.
Tónlistarkviss fjölskyldunnar. Fyrir 8 ára og eldri
Hvað veist þú um tónlist – og hver í fjölskyldunni veit mest? Í Tónlistarkvissi fjölskyldunnar spila fjölskyldur saman í liðum og spreyta sig á alls konar spurningum um tónlist, bæði nýja og gamla. Lög, flytjendur og tónlistargrúsk af ýmsu tagi koma við sögu og allir geta lagt sitt af mörkum. Einar Sv. Tryggvason, tónskáld og sérlegur kviss-aðdáandi, heldur utan um fjörið. Skemmtileg stund fyrir tónlistarþyrstar fjölskyldur sem vilja reyna á kunnáttuna og hafa gaman saman!
Pétur og úlfurinn
Hið sígilda tónævintýri Sergeis Prokofiev, Pétur og úlfurinn, er hér fært á svið í margrómaðri brúðusýningu brúðumeistarans Bernd Ogrodnik. Sýningin hefur farið víða frá því hún var frumsýnd árið 2006 og heillað jafnt börn sem fullorðna. Með brúðum, tónlist og frásögn fylgjumst við með Pétri leggja af stað út í skóg, þar sem hann hittir fyrir litrík dýr og lendir að lokum augliti til auglitis við úlfinn. Persónur sögunnar eiga sér hver sinn hljóm í tónlist Prokofievs og saman skapa tónlistin og brúðurnar ævintýraheim fyrir alla fjölskylduna. Sýningin er á íslensku en sterk sjónræn frásögn og tónlistin gera það að verkum að hægt er að njóta hennar óháð tungumáli.
Kíkjum baksviðs! Fyrir 9–15 ára
Hvað leynist á bak við tjöldin í Hörpu? Í þessari skoðunarferð fá krakkar og unglingar að kíkja á staði sem gestir Hörpu sjá alla jafna ekki. Við förum baksviðs, upp og niður stiga, eftir göngum og ranghölum og skoðum ýmsa króka og kima hússins. Hvernig lítur Harpa út frá hinni hliðinni? Hvað gerist baksviðs áður en tónleikar og sýningar hefjast? Og hvað leynist á bak við allar þessar dyr? Spennandi leiðangur um Harpu fyrir forvitna krakka sem vilja sjá húsið frá allt öðru sjónarhorni.
Barokk vindar – tónlistarævintýri. Fyrir 6–15 ára
Barokk vindar og Bogadregin brotagull í sandinum er frumsamið tónlistarævintýri þar sem sögufrásögn, lifandi tónlist og sjónræn sköpun fléttast saman. Tónlist frá barokktímanum er flutt af Barokkbandinu Brák og leiðir áhorfendur inn í heim sögunnar. Þar kynnumst við forvitna froskinum Fróða, uglunni Yfirsýn, hugrökku músinni Lísu og Monu, tónlistarelskandi stúlku sem getur talað við dýr. Þegar heimili þeirra er ógnað þurfa þau að standa saman og láta til sín taka. Ævintýrið er samið af Angelu Árnadóttur og fjallar á skapandi hátt um rétt barna til heimilis, náttúru og þátttöku í heiminum.
Sungið fyrir dýrin með Ragnheiði Gröndal
Ragnheiður Gröndal syngur fyrir okkur lög sem fjalla um dýr – ást okkar á þeim, forvitni og hrifningu, og stundum lífið frá sjónarhorni dýranna sjálfra. Á efnisskránni eru meðal annars kunnugleg lög á borð við Heyrðu snöggvast Snati minn, Komdu kisa mín og Söng villiandarinnar. Með Ragnheiði leika Guðmundur Pétursson á gítar og Birgir Steinn Theodórsson. Notalegir og fjörugir tónleikar fyrir alla fjölskylduna þar sem dýrin fá að vera í aðalhlutverki.
Krakka-kammermúsíkklúbburinn. Fyrir 6–15 ára
Fjölskyldudagskrá Hörpu og Kammermúsíkklúbburinn bjóða upp á notalega kammertónleika þar sem ungir og efnilegir hljóðfæraleikarar stíga á svið og flytja fjölbreytta og aðgengilega tónlist. Á tónleikunum fá ungir hlustendur jafnframt að kynnast heimi kammertónlistarinnar, hljóðfærunum, tónskáldunum og tónlistinni sem flutt er. Skemmtileg leið fyrir börn og fjölskyldur til að kynnast kammertónlist og ungu tónlistarfólki framtíðarinnar.
Maxímús Músíkús heimsækir hljómsveitina
Maxímús Músíkús er mættur aftur – og í þetta sinn heimsækir hann heila hljómsveit! Flutt verður hin sígilda saga Maxímús Músíkús heimsækir hljómsveitina, þar sem börn fylgja Maxímúsi inn í spennandi heim sinfóníuhljómsveitarinnar og kynnast um leið ólíkum hljóðfærum hennar og hljómum. Sagan er flutt við lifandi hljóðfæraleik Sinfóníuhljómsveitar Tónlistarskóla Hafnarfjarðar undir stjórn Ármanns Helgasonar.
Listauppskera Fellaskóla. Fyrir 12–16 ára
Nemendur Fellaskóla stíga á svið í Kaldalóni og sýna afrakstur skapandi starfs vetrarins. Í Fellaskóla er lögð rík áhersla á tónlist og skapandi skólastarf í Draumaskólanum Fellaskóla, þar sem hugmyndir, styrkleikar og sköpunarkraftur nemenda fá að njóta sín. Tvisvar á ári eru haldnir sérstakir þemadagar þar sem nemendur vinna á fjölbreyttan og skapandi hátt út frá bókmenntum. Á uppskeruhátíðinni í Hörpu fáum við að sjá og heyra verk sem hafa orðið til á þessum dögum, meðal annars frumsamin lög og stuttmyndir eftir nemendur. Fjölbreytt og lifandi dagskrá þar sem krakkarnir í Fellaskóla stíga sjálfir fram og deila sköpun sinni með gestum.
Fjölmenningarhátíð - Allur aldur
Á Fjölmenningarhátíð í Hörpu verður tónlist og menning frá ólíkum heimshornum í forgrunni. Boðið verður upp á notalega stund fyrir börn og fjölskyldur þar sem gestir fá að kynnast tónlist og menningu frá ýmsum heimshlutum og njóta samverunnar. Opið er frá kl. 11:00–13:00 og gestir geta komið og farið að vild. Nánari dagskrá verður auglýst þegar nær dregur.
Vinsamlega athugið að hér fyrir neðan birtast allir viðburðir fyrir börn og fjölskyldur sem haldnir eru í Hörpu. Harpa leigir einnig út sali til viðburðahaldara og eru þeir viðburðir ekki hluti af fjölskyldudagskrá Hörpu. Viðburðir á vegum Hörpu eru ókeypis og eru sérstaklega merktir Fjölskyldudagskrá Hörpu.
Allir barnaviðburðir í Hörpu
Hljóðhimnar barnarými
Hljóðhimnar er upplifunarrými fyrir börn og fjölskyldur þeirra, staður til að uppgötva töfraheim hljóðs og tóna. Hægt er að setja sig í stellingar hljómsveitarstjóra Sinfóníuhljómsveitar Íslands, kíkja inn í músaholur Maxímús Músíkús, sigla um með Tónstýri Stórsveitar Reykjavíkur eða hringja í óperusíma. Í Hljóðhimnum slær hjarta barnamenningar í Hörpu. Rýmið er aðgengilegt gestum á opnunartíma hússins og aðgangur frír.
