Fjölskyldudagskrá
Harpa leggur ríka áherslu á barna- og fjölskyldumenningu og býður upp á fjölskyldudagskrá sem er aðgengileg öllum börnum, gestum að kostnaðarlausu.
Harpa vill ná til allra barna til að sýna þeim að þau eigi sér stað í Hörpu og geti notið menningar og lista, auk þess að skapa sjálf.
Í dagskrárstefnu Hörpu fyrir börn og fjölskyldur er áhersla sett á að aðlaga viðburði að börnum og fjölskyldum af ólíkum uppruna og með ólíkar þarfir. Lögð er áhersla á þátttöku, upplifun, fræðslu, fjölbreytni og fjölmenningu í viðburðum. Markmiðið er að tengjast mismunandi hópum samfélagsins. Er það til dæmis gert með túlkun á mismunandi tungumálum eða beinni þátttöku barna frá ólíkum leik-, grunn- og tónlistarskólum.
Dagskrá starfsársins 2025-2026
Í vetur býður Harpa upp á litríka og lifandi fjölskyldudagskrá þar sem tónlist og sköpun eru í forgrunni. Á dagskránni eru yfir tuttugu fjölbreyttir viðburðir fyrir börn á öllum aldri og fjölskyldur þeirra. Unnið er með alls kyns tónlistarstíla – allt frá klassík og djassi yfir í samtímatónlist, hipphopp, kvikmyndatónlist og tónlist frá ólíkum heimshlutum. Börn fá að hlusta, læra, dansa, syngja, skapa og njóta.
Viðburðirnir eru sniðnir að mismunandi aldurshópum, en margir þeirra eru sérstaklega hannaðir til að njóta saman sem fjölskylda. Heimstónlist í Hörpu fær sérstakan sess í vetur með mánaðarlegum viðburðum sem leiða að heimstónlistarhátíð í júní 2026.
Allir viðburðir eru ókeypis og öll hjartanlega velkomin.
Skoðunarferðir um Hörpu með Maxímús Músíkús 5-12 ára
Ingibjörg Fríða leiðir spennandi skoðunarferð fyrir börn á aldrinum 5–12 ára í fylgd fullorðinna, þar sem leitin að Maxímús Músíkús stendur yfir. Við könnum ýmsa sali, króka og kima Hörpu og skoðum hvort þetta séu góðir staðir fyrir litla mús að búa á – enda er Maxímús Músíkús langminnsti íbúi sem skráður er til heimilis í Hörpu. Ferðin tekur um 30 mínútur og endar í barnarýminu Hljóðhimnum á fyrstu hæð.
Heimstónlist í Hörpu: Tónlist frá Mið- og Suður-Ameríku - Allur aldur
Heimstónlist í Hörpu er ný viðburðaröð í fjölskyldudagskrá Hörpu þar sem gestir fá að kynnast tónlist og menningu frá ólíkum heimshlutum með lifandi tónlistarflutningi, þátttöku og upplifun. Hljómsveitin Los Bomboneros hefur sérhæft sig í tónlist frá Mið- og Suður-Ameríku, ásamt eigin tónlist. Þau hafa notið mikilla vinsælda og tónleikar þeirra breytast oft í líflegt og funheitt danspartý!
Heimstónlist í Hörpu: Tónlist frá Vestur-Afríku - Allur aldur
Heimstónlist í Hörpu er ný viðburðaröð í fjölskyldudagskrá Hörpu þar sem gestir fá að kynnast tónlist og menningu frá ólíkum heimshlutum með lifandi tónlistarflutningi, þátttöku og upplifun. Dansarar og trommarar frá Dans Afríka Iceland og hljómsveitin Barakan band leiða gesti inn í töfrandi heim afrískra slagverkshljóða og dillandi takta.
Plötusnúðanámskeið með Sunnu Ben og Silju Glømmi 11-15 ára
Hefur þig alltaf dreymt um að læra að vera plötusnúður? Nú er tækifærið þitt! Plötusnúðarnir Sunna Ben og Silja Glømmi kenna krökkum grunnatriðin – hvernig á að mixa lög, lesa stemninguna og skapa fullkomið partý andrúmsloft! Aldur 11-15 ára.
Bambaló – Tónlistarstund fyrir yngstu börnin 1-5 ára
Fjölskyldudagskrá Hörpu í samstarfi við Bókamessu bjóða uppá dásamlega tónlistarstund fyrir yngstu börnin og foreldra þar sem tónlist, samvera og skynjun fléttast saman í notalega upplifun. Viðburðurinn er í tilefni útgáfu tónlistarbókarinnar Bambaló: Fyrstu lögin okkar eftir Sigrúnu Harðardóttur og Linn Janssen. Stundin er sérstaklega hönnuð fyrir börn á aldrinum 1–5 ára – róleg, hlý og full af tónlistartöfrum.
Jólastund fjölskyldunnar í Hörpu - Allur aldur
Harpa býður börnum og fjölskyldum í hlýlega og notalega jólastund í Hörpuhorni. Það verður dansað í kringum jólatréð, sungið með Barnakórnum við tjörnina, föndrað með Þykjó og Eyjólfur Eyjólfsson ásamt langspilshópi kynna þetta einstaka íslenska hljóðfæri sem nú á sitt eigið heimili í Hljóðhimnum, tónlistarrými barna í Hörpu. Auðvitað lætur Maxímús Músíkús sig ekki vanta, hann mætir í jólaskapi! Gestir geta komið og farið þegar þeim hentar, viðburðurinn er opinn frá 11–14.
Jazz Hrekkur – Tónleikadagskrá fyrir fjölskyldur 5-12 ára
Tónleikadagskrá fyrir alla fjölskylduna þar sem reiddir verða fram jazztónar byggðir á þjóðtrú um að á tímamótum verði skilin milli mannheima og heima hins yfirnáttúrulega óljós – álfar, huldufólk og uppvakningar birtast. Söngkonan Ingibjörg Fríða Helgadóttir, píanóleikarinn Sunna Gunnlaugsdóttir og kontrabassaleikarinn Leifur Gunnarsson sem fræða börnin um jazztónlist. Tónlistin er samin af Leifi Gunnarssyni og tónleikagestir mega búast við fjörugum og fræðandi tónleikum þar sem boðið verður upp á virka þátttöku í gegnum söng, klapp og dans. Al
Hljóðbað í Hörpu 4-14 ára
Margar fjölskyldur hafa það fyrir sið að fara í sund á sunnudögum en nú gefst þeim tækifæri til að breyta svolítið til og skella sér í hljóðbað í Hörpu! Fjölskyldudagskrá Hörpu býður í samvinnu við Myrka Músíkdaga upp á opna tónlistarsmiðju fyrir börn og fjölskyldur þar sem þeim gefst tækifæri til að baða sig í tónlist, leika sér með hljóð og tóna og útbúa sín eigin hljóðfæri. Smiðjan er opin öllum fjölskyldum og hægt er að koma og fara eins og hverjum og einum hentar. Nánari dagskrá verður auglýst síðar.
Hipphopp dansveisla - Allur aldur
Dans Brynju Péturs, í samstarfi við Fjölskyldudagskrá Hörpu, býður til kraftmikillar street dansveislu í Flóa á jarðhæð Hörpu, sunnudaginn 15. febrúar. Viðburðurinn sameinar danssýningu og danskennslu þar sem hæfileikaríkur hópur dansara fyllir rýmið af sprúðlandi orku, gleði og takti – og gestir eru hvattir til að taka þátt! Aðgangur er ókeypis og öll hjartanlega velkomin.
Heimstónlist í Hörpu: Tónlist frá Austur-Asíu - Allur aldur
Heimstónlist í Hörpu er viðburðaröð í fjölskyldudagskrá Hörpu þar sem gestir fá að kynnast tónlist og menningu ólíkra heimshluta í gegnum lifandi flutning, þátttöku og samveru.Á þessum þriðja viðburði í röðinni fræðast gestir um tónlist frá Austur-Asíu, með áherslu á Kína, Japan og Mongólíu. Við kynnumst nýjum hljóðfærum, lærum lög og fáum tækifæri til að taka virkan þátt í gleðinni. Nánari dagskrá verður auglýst þegar nær dregur.
Kvikmyndatónlist: Tónar og tilfinningar 10-16 ára
Skemmtilegur viðburður fyrir börn, unglinga og foreldra þar sem kvikmyndatónlistin er tekin til skoðunar í allri sinni fjölbreytni. Kvikmyndatónskáldið Einar Sveinn Tryggvason fræðir áhorfendur um mismunandi tegundir kvikmyndatónlistar og sýnir hljóð- og mynddæmi á skjávarpa. Hvaða áhrif hefur tónlistin sem hljómar í kvikmyndum á okkur? Hvernig breytist upplifunin þegar tónlistin breytist?
Krakkabarokk í Eldborg 5-15 ára
Fjölskyldutónleikar þar sem Kammerhópurinn ReykjavíkBarokk flytur fjölbreytta tónlist frá barokk- og endurreisnartímanum í félagi við tónlistarnemendur og kórsöngvara af höfuðborgarsvæðinu og Suðurlandi. Á tónleikunum má heyra einleik, samleik og kórsöng með undirleik hátíðarhljómsveitar Krakkabarokks – glæsileg samverustund þar sem hinn ríki tónlistararfur fær að blómstra í höndum ungra og efnilegra flytjenda.
Dúó Stemma brokkar fyrir börnin 3-12 ára
Dúó Stemma leikur sér á óhefðbundinn hátt með íslensk þjóðlög frá tímum barokkmeistaranna og spilar á „barokkhljóðfæri“ Íslands, svo sem hrossakjálka, steina og skeljar. Dúóið skipa Herdís Anna Jónsdóttir víóluleikari og Steef van Oosterhout slagverksleikari, sem hafa í mörg ár skapað skemmtileg og fræðandi tónlistarprógrömm fyrir yngri kynslóðina.
Krakka-kammermúsíkklúbburinn
Fjölskyldudagskrá Hörpu, í samstarfi við Kammermúsíkklúbbinn, býður upp á notalega kammertónleika í Kaldalóni þar sem ungir og efnilegir hljóðfæraleikarar stíga á svið og flytja fjölbreytta og aðgengilega efnisskrá. Áheyrendur fá jafnframt innsýn í heim kammertónlistarinnar með fróðleik um hljóðfærin, tónskáldin og tónlistarstílinn – með það að markmiði að dýpka skilning og auka áhuga ungra hlustenda. Nánari dagskrá verður auglýst þegar nær dregur.
Söngstund með Maxímús Músíkús 1-6 ára
Ingibjörg Fríða og Siggi leiða börn og fjölskyldur í stórskemmtilega og lifandi söngstund þar sem sungin verða ýmis þekkt og skemmtileg barnalög. Maxímús Músíkús lætur sig ekki vanta og tekur þátt í gleðinni með sínum fjöruga hætti! Söngstundin er tilvalin leið fyrir börn að njóta tónlistar, hreyfingar og samveru.
Sögustund með Maxa 4-12 ára
Í sögustund með Maxa fá áhorfendur að fylgjast með tónlistarævintýrum hinnar ástsælu músar Maxímúsar Músíkúsar, úr hinum vinsæla bókaflokki eftir Hallfríði Ólafsdóttur og Þórarinn Má Baldursson. Stundin er hlý, skemmtileg og tilvalin fyrir börn sem elska sögur, tónlist og töfra.
Heimstónlist í Hörpu: Mið- og Austur-Evrópa - Allur aldur
Heimstónlist í Hörpu er viðburðaröð í fjölskyldudagskrá Hörpu þar sem gestir fá að kynnast tónlist og menningu ólíkra heimshluta í gegnum lifandi flutning, þátttöku og samveru. Á þessum fjórða viðburði raðarinnar dýfum við okkur í menningarheim Mið- og Austur-Evrópu, með áherslu á Pólland, Serbíu og Úkraínu. Við kynnumst nýjum hljóðfærum, lærum takta og stef og njótum tónlistarinnar saman í notalegri stund.
Heimstónlistarhátíð Hörpu - Allur aldur
Heimstónlistarhátíð Hörpu er uppskeruhátíð samnefndrar viðburðaraðar þar sem tónlist og menning frá ólíkum heimshlutum hefur verið í forgrunni allt starfsárið. Á hátíðinni verður sannkölluð hátíðarstemning í húsinu þegar gestir fá að upplifa tónlist frá Vestur-Afríku, Austur-Asíu, Mið- og Austur-Evrópu og Mið- og Suður-Ameríku, taka þátt í söng og dansi, skapa handverk innblásið af mismunandi menningarheimum og smakka mat frá ýmsum löndum.
Vinsamlega athugið að hér fyrir neðan birtast allir viðburðir fyrir börn og fjölskyldur sem haldnir eru í Hörpu. Harpa leigir einnig út sali til viðburðahaldara og eru þeir viðburðir ekki hluti af fjölskyldudagskrá Hörpu. Viðburðir á vegum Hörpu eru ókeypis og eru sérstaklega merktir Fjölskyldudagskrá Hörpu.
Hljóðhimnar barnarými
Hljóðhimnar er upplifunarrými fyrir börn og fjölskyldur þeirra, staður til að uppgötva töfraheim hljóðs og tóna. Hægt er að setja sig í stellingar hljómsveitarstjóra Sinfóníuhljómsveitar Íslands, kíkja inn í músaholur Maxímús Músíkús, sigla um með Tónstýri Stórsveitar Reykjavíkur eða hringja í óperusíma. Í Hljóðhimnum slær hjarta barnamenningar í Hörpu. Rýmið er aðgengilegt gestum á opnunartíma hússins og aðgangur frír.
