Fjöl­skyldu­dag­skrá Hörpu: Heims­tónlist í Hörpu: Tónlist frá Aust­ur-Asíu

Heimstónlist í Hörpu: Tónlist frá Austur-Asíu

Heimstónlist í Hörpu er viðburðaröð í fjölskyldudagskrá Hörpu þar sem gestir fá að kynnast tónlist og menningu ólíkra heimshluta í gegnum lifandi flutning, þátttöku og samveru. Röðinni lýkur með heimstónlistarhátíð fyrir börn í júní 2026.

Á þessum þriðja viðburði í röðinni kynnumst við tónlist frá Austur-Asíu, með áherslu á Kína, Japan og Mongólíu. Við kynnumst nýjum hljóðfærum, lærum lög og fáum tækifæri til að taka virkan þátt í gleðinni.

Tónlistarmaðurinn Khairkhan er búsettur á Íslandi og ættaður frá Mongólíu. Hann kynnir okkur fyrir mongólskum strengjahljóðfærum og hinum ótrúlega magnaða barkasöng sem iðkaður hefur verið í Mongólíu um aldir alda. Sherine Otomo er innanhúshönnuður, fædd í Japan og hefur búið á Íslandi í nokkur ár. Hún flytur kvæði og ljóð samkvæmt hinni aldagömlu japönsku Shigin-sönghefð. Söngkonan Xu Wen flytur einnig lög frá Kína við undirleik Arnhildar Valgarðsdóttur píanóleikara. 

Tónleikarnir hefjast kl. 13 og eru um 45 mínútur.

Frá 13 - 15 leiðir Japanski móðurmálskálinn smiðju í japönsku origami þar sem hægt verður að búa til litríka skúlptúra úr fallegum pappír.

Viðburðurinn fer fram í Hörpuhorni.

Viðburðahaldari

Harpa