sígild og samtímatónlist, tónlist
Ljúfsár kvöl í 400 ár – þrjár kynslóðir tónskálda
Verð
3.900 kr
Næsti viðburður
mánudagur 20. maí - 20:00
Salur
Kaldalón
Ljúfsár kvöl í 400 ár – þrjár kynslóðir tónskálda
Sögusviðið er Ítalía á fyrstu áratugum 17. aldar. Á þessum tíma voru nýjar og spennandi hugmyndir að ryðja sér til rúms í ítölsku tónlistarlífi, en einn brautryðjendanna var Claudio Monteverdi frá norður-ítölsku borginni Cremona. Verk hans urðu uppspretta ritdeilna vegna djarfrar notkunar á ómstríðum tónum, en í tónlist hans þurftu reglur kontrapunktsins stundum að lúta í lægra haldi fyrir þeim ástríðum sem textinn átti að tjá. Einn nemenda Monteverdis var óperutónskáldið Francesco Cavalli, sem naut mikilla vinsælda í Feneyjum um miðja 17. öld, en sum verka hans voru einnig flutt í París á æskuárum Lúðvíks fjórtánda. Cavalli kenndi svo feneysku söngkonunni Barböru Strozzi, sem hóf feril sinn 16 ára gömul á stofutónleikum í húsi fósturföður síns og tók síðar virkan þátt í fundum menntamannahópsins sem hann stofnaði, Accademia degli Unisoni. Eftir hana liggja þó nokkur söfn söngtónlistar sem birtust á prenti milli 1644 og 1664, fyrst og fremst fyrir einsöngsrödd með continuo-undirleik. Á tónleikunum hljóma verk eftir þessi þrjú tónskáld og við leitumst við að rannsaka hvernig tónlistarstefna berst frá kennara til nemanda en breytist einnig með hverju nýju tónskáldi. Titill tónleikanna er innblásinn af hinu fræga lagi Si dolce è´l tormento eftir Claudio Monteverdi, en í ár eru liðin 400 ár frá því að það birtist á prenti.
Ensemble Elegos samanstendur af ungum tónlistarmönnum sem hafa menntað sig í upprunaflutningi. Ítalski tenórinn Enrico Busia er sérlega reyndur í flutningi snemmbarokktónlistar frá heimalandi sínu, en Sólveig Thoroddsen og Sergio Coto Blanco eru sérhæfð í plokkuðum strengjahljóðfærum fyrri alda. Leikið er á endurgerðir af gömlum hljóðfærum.
Efnisskrá: valin verk eftir Claudio Monteverdi, Francesco Cavalli, Barböru Strozzi, Girolamo Frescobaldi og Angelo Michele Bartolotti
Ensemble
Elegos:
Enrico
Busia tenór
Sólveig
Thoroddsen barokkharpa
Sergio Coto Blancoteorba og barokkgítar
Viðburðahaldari
Ensemble Elegos
Miðaverð er sem hér segir:
A
3.900 kr.
Hápunktar í Hörpu