Andrew J. Yang einleiks­tón­leikar - Sígildir sunnu­dagar

Undrabarn, sem nær að fanga tilfinningaskalann frá hinum dýpsta kjarna til tilkomumikilla flugeldasýninga.
- The San Francisco Examiner

Hæfileikaríkur og einlægur píanóleikari - sannur listamaður.
- Ruth Slenczynska, lifandi goðsögn og fyrrum nemandi Rachmaninoffs

Andrew J. Yang hefur komið fram á tónleikum víða um heim m.a. í Carnegie Hall í New York, Auditorium Marcel Landowski í París, Musiikkitalo í Helsinki, Menningarsetri gyðinga í Kraká, Mozarthaus í Vínarborg, Hoheikan í Sapporo Japan, og tónleikasölum í Llanes og Ribadesella á Spáni. Hann hefur hlotið verðlaun og viðurkenningar í fjölmörgum alþjóðlegum píanókeppnum, m.a. hlaut hann fyrstu verðlaun í Alþjóðlegu FLAME píanókeppninni í París en af öðrum píanókeppnum þar sem hann hefur unnið til verðlauna má nefna Euregio Piano Award keppnina í Þýskalandi, Metropolitan keppnina í New York, Heida Hermanns keppnina í Connecticut, Thaviu-Isaac í Chicago, Franz Liszt keppnina í Los Angeles. Andrew er fæddur og uppalinn í Kaliforníu og útskrifaðist með B.A. í hagfræði og B.M. í píanóleik frá Northwestern háskólanum í Illinois og mastersgráðu í píanóleik frá Mannes tónlistarskólanum í New York og hlaut hann Steinway & Sons verðlaunin, sem veitt eru framúrskarandi útskriftarnema. Meðal kennara hans má nefna hinn virta William Wellborn, Antoinette Perry, Dang Thai Son, og Ruth Slenczynska. Hann fluttist til Patreksfjarðar fyrir fimm árum og hefur síðan þá verið áberandi í íslensku tónlistarlífi og vakið athygli sem einn af áhugaverðari píanóleikurum landsins. Andrew er stofnandi og listrænn stjórnandi Reykjavík Pianofest og Alþjóðlegu píanóhátíðar Vestfjarða og hlaut sú hátíð hvatningarverðlaun Eyrarrósarinnar árið 2023. Árið 2018 veitti forseti Finnlands honum heiðursverðlaunin Hvítu rósina, fyrir framúrskarandi tónlistarflutning. Andrew J. Yang er fyrrverandi keppnismaður í íþróttum eins og badminton, körfubolta og boxi. Hann býr núna á höfuðborgarsvæðinu og kennir við Tónskóla Sigursveins og Tónskólann í Reykjavík.