Upprásin
Ný tónleikaröð tileinkuð grasrót íslenskrar tónlistar, þvert á tónlistarstefnur.
Harpa, í samstarfi við Tónlistarborgina Reykjavík og Rás 2, stendur fyrir nýrri tónleikaröð sem tileinkuð er grasrót íslenskrar tónlistar, þvert á tónlistarstefnur.
Tónleikaröðin kallast Upprásin og fer fram í Kaldalóni eitt þriðjudagskvöld í mánuði veturinn 2023-2024. Tónleikaröðin er liður í því að framfylgja dagskrárstefnu Hörpu um bætt aðgengi grasrótar og ungs fólks í öllum tónlistargreinum og auka við fjölbreytni. Markmiðið er einnig að tónlistaráhugafólk geti gengið að því vísu að heyra fjölbreytta nýja íslenska tónlist, beint úr grasrót tónlistarlífsins, flutta við kjöraðstæður í tónlistarhúsi þjóðarinnar
Harpa styrkir tónleikaröðina með því að veita aðstöðu, tækjabúnað og tæknimann auk utanumhalds. Tónlistarborgin Reykjavík styður við tónlistarfólkið sem kemur fram og Rás 2 sér um að kynna það, m.a. í þættinum Ólátagarði undir stjórn Bjarna Daníels. Tónlistarfólkið sem kemur fram hverju sinni fær upptöku frá tónleikunum.
Opnað var fyrir umsóknir 17. maí 2023 og var allt tónlistarfólk sem skilgreinir sig sem grasrót í íslensku tónlistarlífi, af öllum kynjum og þjóðernum, hvatt til að sækja um. Umsóknarfresti er lokið.
Valnefnd fór yfir innsendar umsóknir og valdi það tónlistarfólk sem kemur fram í þessari fyrstu tónleikaröð en þrjár hljómsveitir koma fram á hverju kvöldi. Valnefndina skipa Bjarni Daníel fyrir hönd Rásar 2, Ása Dýradóttir fyrir hönd Tónlistarborgarinnar Reykjavík, Sóley Stefánsdóttir fyrir hönd dagskrárráðs Hörpu og Ása Berglind Hjálmarsdóttir verkefnastjóri dagskrárgerðar í Hörpu. Nánari upplýsingar veitir asaberglind@harpa.is.
Kaldalón
Kaldalón hentar sérstaklega vel fyrir minni tónleika, ráðstefnur, fundi og fyrirlestra. Salurinn er með hallandi sætum og hægt er að sýna myndbönd á stóru sýningartjaldi. Norðurbryggja, fyrir framan Kaldalón, skartar stórkostlegu útsýni yfir smábátahöfnina og hentar afar vel fyrir ýmis konar móttökur og sýningar.
