Upprásin | HáRún, ΔΑΙΜΟΝΙΟ, álfur flyguy skrilljón

Á þessum tónleikum koma fram HáRún, ΔΑΙΜΟΝΙΟ og álfur flyguy skrilljón.

Harpa, í samstarfi við Tónlistarborgina Reykjavík og Rás 2, stendur fyrir Upprásinni, tónleikaröð sem tileinkuð er grasrót íslenskrar tónlistar, þvert á tónlistarstefnur.

Upprásin fer nú fram fjórða árið í röð og munu samtals 27 hljómsveitir koma fram, þrjár á hverju tónleikakvöldi. Tónleikaröðin er liður í því að framfylgja dagskrárstefnu Hörpu um bætt aðgengi grasrótar og ungs fólks í öllum tónlistargreinum og auka við fjölbreytni. Markmiðið er einnig að tónlistaráhugafólk geti gengið að því vísu að heyra fjölbreytta nýja íslenska tónlist, beint úr grasrót tónlistarlífsins, flutta við kjöraðstæður í
tónlistarhúsi þjóðarinnar. Miðaverð er aðeins 2000 kr. en hægt er að leggja til hærri upphæð í miðasöluferlinu sem rennur beint til listafólksins.

HáRún, eða Helga
Rún Guðmundsdóttir, er indí-folk/popp söngvaskáld sem syngur hjartnæm lög á
íslensku. Kassagítarinn spilar stórt hlutverk í lögunum, textarnir eru einlægir
og kraftmikla röddin dregur hlustandann nær. HáRún dregur innblástur úr ýmsum
áttum og málar oft upp myndir í lögum sínum með náttúrunni, en lögin fjalla
meðal annars um söknuð, ofhugsanir, og löngunina að tilheyra. Hún gaf út sitt
fyrsta lag í febrúar 2025 og er núna að vinna að sinni fyrstu plötu sem mun
líta dagsins ljós haustið 2026. 
  
ΔΑΙΜΟΝΙΟ - sem þýðir verndarandi á grísku - skapar háværa og seiðandi raftónlist þar sem tónlistin spannar allt frá ambient-hljóðheimum til hraðrar tekno-tónlistar. Hún starfar þvert á miðla tónlistar og myndlistar. Nýjasta platan hennar, EPAGOGI, kom út árið 2026.

álfur fluguy skrilljón eru nýbakaðir tónlistarmenn, ennþá blautir bakvið eyrun, nýskriðnir úr kviðnum, ennþá með horið í nefinu og klístrið í kverkunum. Óumdeilanlegir hæfileikar og búa til tilraunakennt rapp ólíkt öllu sem þú hefur heyrt, frussandi bassi, ískrandi laglínur, íslenskur texti og rífandi stemming.