Harpa fagnar 15 ára afmæli sínu á Menningarnótt og býður af því tilefni upp á veglega viðburðadagskrá frá kl. 12:00. Dagskráin teygir sig um allt hús og út á Hörputorg en alls verða um 40 fjölbreyttir viðburðir í boði fyrir unga sem aldna. Lokahljómurinn verður sleginn upp úr klukkan 18 þegar Ragnheiður Gröndal og karlakórinn Fóstbræður leiða samsöng gesta í alrými Hörpu.

Fjölbreytt og glæsileg tónlistardagskrá

Tónlistin skipar að sjálfsögðu veglegan sess í dagskrá Menningarnætur í Hörpu og fjölbreytnin ræður þar ríkjum. Gestir geta dillað sér við sjóðheita salsatónlist og stórsveitarsveiflu, drukkið í sig tregablandinn blús og hlýtt á litskrúðuga kórtónlist og kammermúsík svo fátt eitt sé nefnt. Á meðal flytjenda eru kórarnir Fóstbræður og Huldur, Stórsveit Reykjavíkur ásamt Kristjönu Stefánsdóttur og salsasveitin Barrio 27.

Blúsfélag Reykjavíkur gengst fyrir glæsilegri blúshátíð í Flóa og í Kaldalóni verður bæði boðið upp á færeyska tónlistarveislu og einstaka kórtónleika þar sem trommukór, tölvukór og flautukórinn viibra þenja út kórahugtakið.

Sólmyrkvaleikar í tónum og tali

Sinfóníuhljómsveit Íslands býður til glæsilegrar Sólmyrkvahátíðar í Eldborg ásamt hinum eina sanna Stjörnu-Sævari. Þar verða sól og máni í aðalhlutverki í tali og tónum og ekki er ósennilegt að nýafstaðinn almyrkva á sólu beri á góma. Aðgangur á tónleika Sinfóníuhljómsveitar Íslands er ókeypis og hægt er að sækja miða á sinfonia.is og í miðasölu Hörpu á tónleikadegi frá kl. 10:00.

Sólmyrkvinn svífur einnig yfir vötnum á Sólmyrkvaleikum í Norðurljósum þar sem Krakkakór ÞYKJÓ ásamt hljómsveit flytja glæný lög og ljóð eftir börn frá gervöllum Vestfjörðum. Öll eru lögin innblásin af „stystu nótt í heimi" en kynnir verður tónlistar- og dagskrárgerðarkonan Ingibjörg Fríða sem mun gægjast í sína sívinsælu og fróðlegu Þjóðsögukistu. ÞYKJÓ töfrar fram skuggaleikhús við tónlist barnanna og einnig verða sýndar stuttmyndir eftir vestfirsk börn sem hverfast um náttúruundrið mikla á himni.

Sólmyrkvaleikar fara fram í Norðurljósum klukkan 14 og 16 og vara í um 40 mínútur, tónleikar Sinfóníuhljómsveitarinnar hefjast svo klukkan 15 og klukkan 17.

Nærandi fjölskyldudagskrá

Viðburðir fyrir börn og fjölskyldur verða fjölmargir í Hörpu á Menningarnótt. Á Hörputorgi verður hin sívinsæla bátasmiðja Memmm á sínum stað og í Hörpuhorni geta yngstu krílin notið notalegrar tónlistarstundar ásamt foreldrum sínum með tónlistarkonunni Sigrúnu Harðardóttur. Hin einstaka Korda Samfónía býður til hvort tveggja lagasmiðju og samsöngs í Silfurbergi og ÞYKJÓ hreiðrar um sig víðs vegar á jarðhæð Hörpu og leiðir afmæliskórónugerð og könnunarleiðangra um heim dýratóna og fuglasöngs. Ekki má svo gleyma tónlistarmúsinni Maxímús Músíkús, sem verður á ferð og flugi um húsið í sérstöku tyllidagaskapi.

Dans dans dans

Dansinn mun duna um gervalla Hörpu á Menningarnótt. Dönsurum úr Íslenska dansflokknum bregður fyrir í óvæntum og lifandi innskotum víðs vegar um húsið og í Hörpuhorni geta börn og fjölskyldur stigið Dans ársins ásamt Ingu Maren Rúnarsdóttur, dansara og Áskeli Harðarsyni sem þeytir skífum. Slegið verður upp seiðandi tangóballi í Flóa með Bryndísi Halldórsdóttur og Hany Hadya og ekki má gleyma gleðisveitinni Hnokkum sem verður á vappi um húsið og slær upp sprellfjörugu sveifluballi með dönsurum frá Sveiflustöðinni.

Lúðrablástur á Hörputorgi

Á Hörputorgi verður mikið um dýrðir en að baki dagskránni stendur Landsbankinn auk Hörpu. Auk áðurnefndrar bátasmiðju verður hinn árvissi og stórskemmtilegi lúðrasveitabardagi á sínum stað með tilheyrandi mútum, svikum og frændhygli. Dansarar frá Dansi Brynju Péturs stíga kraftmikinn street dans og á Hörputorgi verður seiðandi loftfimleikaatriði auk þess sem Brumm Brumm, bíllinn góði, býður krökkum upp á skemmtilegt prent-tattú.

Íslensk tónlist frá landnámi til heimsfrægðar

Á glænýrri og spennandi upplifunarsýningu í framhúsi Hörpu verður hægt að sökkva sér í heim íslenskrar tónlistar. Ókeypis er á sýninguna í tilefni Menningarnætur frá 13 - 17. Takmarkað pláss er í boði, fyrstir koma, fyrstir fá og aldurstakmark er 10 ára.

Látum Hörpu hljóma

Dagskránni í Hörpu á Menningarnótt lýkur svo upp úr klukkan 18 þegar Ragnheiður Gröndal og Karlakórinn Fóstbræður leiða samsöng gesta í alrými Hörpu. Á efnisskrá verða ástsæl og alkunn dægurlög, þar á meðal eftir tónlistarmennina og lagahöfundana Björgvin Halldórsson, Gunnar Þórðarson, Magnús Eiríksson og Magnús Þór Jónsson, Megas, sem allir kvöddu á árinu. Söngbók með þeim lögum má finna HÉR.

Við hlökkum til að fagna Menningarnótt og 15 ára afmæli Hörpu með ykkur.

Gott að vita

Bílakjallari Hörpu verður opinn á eftirfarandi tímum á Menningarnótt:

• Frá kl. 00:00 – 07:00 Inn- og útakstur bílaumferðar eingöngu um rampinn við Hörpu (Hafnartorg/Kolagata og Reykjastræti lokað).
  
  
• Frá kl. 07:00 – 15:00 Allir þrír inngangar og útgangar bílakjallarans lokaðir fyrir bílaumferð.
  
  
• Frá kl. 15:00 – 21:00 Inn- og útakstur eingöngu um rampinn við Hörpu (Hafnartorg/Kolagata og Reykjastræti lokað).
  
  
• Frá kl. 21:00 – 23:15 Aðgengi að og frá bílakjallara lokar.
  
  
• Allir vagnar Strætó munu koma sér fyrir á Sæbraut til að aka fólki heim eftir flugeldasýningu.

Annað:

• Veitingaþjónusta Hörpu verður með ljúffengar veitingar á boðstólnum á jarðhæð Hörpu þar sem hægt verður að versla drykki, sætmeti, ávexti og fleira.
• Fatahengi er staðsett á K1 við hliðina á rúllustiganum upp á fyrstu hæð.
• Óskilamunir - ef hlutur glatast á deginum biðjum við þig vinsamlega um að senda okkur fyrirspurn og við svörum eins fljótt og auðið er.
• Salerni í Hörpu eru staðsett á öllum hæðum og aðgengileg gestum allan daginn.
• Vatnshani er í Eyri, fyrir utan Silfurberg á annarri hæð.