Anna Sóley og vinir - Múlinn Jazz­klúbbur

Anna Sóley, söngur, fiðla, gítar
Daníel Helgason, gítar
Nico Moreaux, bassi
Magnús Trygason Eliassen, trommur

Anna Sóley blandar saman jazzi og söngvaskáldahefð í impressjónístískum og persónulegum lögum. Frásaga skipar stóran sess í verkum Önnu sem spanna víða sýn en spuni og tjáning hljóðfæraleikara fá mikið rými í flutningi á tónlistinni. Samræður við samtíma, fortíð og skáldsagnapersónur gefa oft tóninn í textunum sem liggja einhvers staðar á milli raunveruleika og draumheima, íslenskrar hjátrúar og heimspeki. Anna sækir til mismunandi stíla eins og samtíma og skandinavísks jazz, alþýðutónlistar, blús og grúftónlistar. Leiknar verða tónsmíðar af væntanlegri breiðskífu í bland við eldri tónsmíðar eftir Önnu og fáein tökulög, tónsmíðar eftir Brian Blade, Ambrose Akinmusire og Kenny Wheeler. Nýju lögin kanna hegðunarmynstur, sérstaklega þá hvernig frásögn á það til að hafa áhrif á sýn okkar á tilveruna. Það endurspeglast í mótífum í tónlistinni sem oft á tíðum hefur einkennandi andrúmsloft sem leiðir athyglina áfram í draumkenndum dansi. „Góð, hlý og innileg“ sagði bandaríski tónlistargagnrýnandinn David Fricke um tónleika Önnu á Off-Venue Airwaves 2024 í þætti sínum The Writer's Block.

Viðburðahaldari

Múlinn Jazzklúbbur