ECHO Rising Stars í Hörpu | Hátíðarpassi

Tónleikaröðin ECHO Rising Stars fer fram í Norðurljósum í Hörpu, helgina 9. - 10. maí 2026 þar sem ungt og framúrskarandi tónlistarfólk, hvaðanæva að, býður upp á litríka og einstaklega spennandi efnisskrár sem saman spanna margar aldir og álfur. Tónleikarnir eru fernir, eru klukkutímalangir og fara fram klukkan 17 og klukkan 20, laugardag og sunnudag. Boðið verður upp á listamannaspjall við flytjendurna bæði laugardag og sunnudag, klukkan 18:30.

Portúgalski Maat-saxófónkvartettinn flytur kraftmikil baráttulög og tónlist sem hverfist um jafnrétti og frelsi. Píanóleikarinn Giorgi Gigashvili frá Georgíu leikur undurfögur og hrífandi einleiksverk fyrir píanó, sígild og splukuný. Austurríski sellóleikarinn Valerie Fritz fléttar saman afar fjölbreyttum einleiksverkum fyrir selló þar sem hreyfingar, lýsing, söngur, myndlist og dans koma við sögu og sópransöngkonan Álfheiður Erla Guðmundsdóttir ásamt píanóleikaranum Kunal Lahiry býður hlustendum í magnað ferðalag sem er innblásið af ljóði Sylviu Plath, Lafði Lazarus!

Á öllum tónleikunum hljómar glæný tónlist, samin sérstaklega fyrir flytjendurna en tónskáldin eru Aleksandra Vrebalov, Jennifer Walshe, María Huld Markan Sigfúsdóttir og Natalie Beridze.

Hátíðarpassi á ferna tónleika tryggir aðgang á alla tónleika hátíðina og kostar aðeins 10.000 krónur.

ECHO RISING STARS Í HÖRPU
9. - 10. MAÍ 2026 Í NORÐURLJÓSUM


Laugardagur, 9. maí

Kl. 17 - 18
Maat saxófónkvartettinn: Blackbird

Kl. 18:30 - 19:30
Listamannaspjall

Kl. 20 - 21
Giorgi Gigashvili: píanó

Sunnudagur, 10. maí

Kl. 17 - 18
Valérie Fritz: Learn to unlearn

Kl. 18:30 - 19:30
Listamannaspjall

Kl. 20 - 21:00
Álfheiður Erla Guðmundsdóttir og Kunal Lahiry: Lady Lazarus

-

ECHO Rising Stars er verkefni á vegum ECHO, Samtaka evrópskra tónleikahúsa. ECHO Rising Stars-verkefnið er margþætt. Það gefur ungu og framúrskarandi tónlistarfólki færi á að koma fram í frábærum tónlistarhúsum víðs vegar um Evrópu og veitir jafnframt ferskum straumum inn í tónlistarlíf og dagskrá viðkomandi tónlistarhúsa. Verkefnið styður við nýsköpun en þeir hópar og einstaklingar sem valdir eru til þátttöku í ECHO Rising Stars panta nýtt tónverk sem flutt er á öllum tónleikum viðkomandi. Samhliða tónleikahaldi tekur tónlistarfólkið þátt í samfélagslegum tónlistarverkefnum sem lúta að miðlun, kennslu og/eða viðburðahaldi, gjarnan utan hins hefðbundna tónleikasalar en verkefnin eru ákveðin í samstarfi við viðkomandi tónlistarhús.

Um 110 tónleikar fara árlega fram á vegum ECHO Rising Stars. Á meðal tónlistarfólks sem komið hefur fram undir merkjum þess eru fiðluleikararnir Patricia Kopatchinskaja, Renaud Capuçon og Janine Jansen, píanóleikararnir Khatia Buniatishvili og Igor Levit, sellóleikarinn Kian Soltani og strengjakvartettarnir Quarteto Casals og Belcea Quartet.

Viðburðahaldari

Harpa