Haukur Gröndal fagnar 50 ára afmæli með stór­tón­leikum í Hörpu

Saxófón- og klarínettleikarinn, tónskáldið og útsetjarinn Haukur Gröndal fagnar 50 ára afmæli með stórtónleikum í Norðurljósasal Hörpu þriðjudagskvöldið 30. desember 2025. Haukur á að baki yfir þrjátíu ára feril í íslensku og alþjóðlegu tónlistarlífi, þar sem hann hefur skapað sér einstakan sess fyrir frumlega rödd, óvenjulega næmni og djúpa sköpunargleði.

Haukur hefur tekið þátt í fjölda tónlistartengdra verkefna á ferli sínum – allt frá lifandi tónlistarflutningi og tónsmíðum til útsetninga og útgáfu tónlistar, bæði hér heima og erlendis. Hljóðheimar hans eru marglaga og persónulegir; stundum spunakenndir og hráir, stundum silkimjúkir og íhugulir – ávallt undir sterku leiðarljósi sköpunar og ástríðu.

Ferill og menntun
Tónlistarnám hóf Haukur í Tónlistarskóla Garðabæjar á barnsaldri, en lauk síðar burtfararprófi í saxófónleik frá Tónlistarskóla FÍH árið 1997. Hann hélt síðan til Danmerkur og lauk meistaranámi frá Rytmisk Musikkonservatorium í Kaupmannahöfn árið 2004. Frá upphafi hefur Haukur unnið ötullega að þróun eigin tónmáls, oft á mörkum djass, klassíkur, heimstónlistar og þjóðlagaarfs.

Tónleikarnir – ferðalag í gegnum tón og tíma
Á efnisskrá tónleikanna eru verk úr ólíkum tímabilum ferilsins – hlustendum er boðið í ferðalag málað persónulegum og ljóðrænum litum. Með sér á sviði hefur Haukur úrvals tónlistarfólk sem hann hefur starfað með í gegnum árin í fjölbreyttu samhengi.

Þetta verður kvöld þar sem núið og minningarnar stíga dans, þar sem þögn og tónn mætast í djúpum samræðum – og hlustandinn verður ekki aðeins gestur, heldur virkur þátttakandi í sögu í mótun.

Þátttakendur
• Haukur Gröndal
• Ragnheiður Gröndal
• Guðmundur Pétursson
• Ásgeir Ásgeirsson
• Þorgrímur Jónsson
• Erik Qvick
• Óskar Guðjónsson
• Snorri Sigurðarson
• Samúel J. Samúelsson
• Magnús Trygvason Eliassen
• Birgir Steinn Theódórsson
• Pétur Grétarsson
• Ólafur Jónsson