Alltaf er einhver sem grætur

Kristjana Arngrímsdóttir, ein helsta þjóðlagasöngkona Íslands og José Manuel Neto, einn virtasti gítarleikari samtímans á portúgalskan gítar, koma saman á einstökum fadotónleikum í Hörpu 1. nóvember. Frábært tækifæri til að upplifa fadotónlist eins og þú hefur aldrei heyrt hana áður þar sem portúgölsk örlagatónlist og íslensk ljóð og lög fléttast saman. Neto leikur á hinn sígilda portúgalska gítar og færir tónlistinni seiðmagnaðan hljóm, á meðan Kristjana setur íslenskan blæ á djúpan og tilfinningaríkan tónheim fado.

Kristjana Arngrímsdóttir, söngkona er fædd á Dalvík og búsett í Svarfaðardal. Kristjana hefur sungið mikið og víða í gegnum tíðina og gefið út fimm sólódiska; Þvílík er ástin, Í húminu, Tangó fyrir lífið, Stjarnanna fjöld og nú síðast Ég hitti þig þar sem hæfileikar hennar sem lagasmiður birtust ljóslifandi við ljóð íslenskra kvenljóðskálda. Tónleikaröðin Gestaboð Kristjönu hafa vakið athygli þar sem hún hefur fengið landsþekkt tónlistarfólk sér til liðs. Nú færir hún okkur suðrænan heim fadotónlistar frá Portúgal en djúp, hljómmikil og seiðandi rödd Kristjönu fellur einstaklega vel að þessari tegund tónlistar.

José Manuel Neto, gítarleikari á portúgalskan gítar frá Lissabon heimsækir Ísland í fyrsta sinn fyrir þessa tónleika. Hann er alinn upp í umhverfi fadotónlistar og hefur lengi verið í fremstu röð á meðal gítarleikara á portúgalskan gítar. Stíll hans einkennist af mýkt, fjölhæfni og einföldu frásagnarformi. Hann hefur í gegnum tíðina komið fram með fremstu fadosöngvurum Portúgals, þar á meðal Carlos do Carmo, Camané, Ana Moura, Mariza og António Zambujo og spilað á virtustu tónleikastöðum heims, svo sem Royal Albert Hall og fleiri stöðum. José hefur hlotið ýmsar viðurkenningar og verðlaun fyrir tónlist sína auk þess sem hann hefur gefið út sólóplötu og samið fyrir kvikmyndir og fleira.

Einstakt tækifæri til að heyra Kristjönu Arngríms og José Manuel töfra fram suðræna stemningu fado á íslensku – aðeins þetta eina kvöld.

Fado er hefðbundin portúgölsk tónlistarstefna sem einkennist af tilfinningaþrungnum söng og djúpri melankólíu. Nafnið „fado“ kemur frá latneska orðinu fatum, sem merkir „örlög“.

Fadotónlist fjallar oft um söknuð (saudade), ást, örlög, sjómennsku og lífið sjálft og er því gjarnan talin spegla sársauka og vonir almennings, sérstaklega frá tíma þegar fólk þurfti að yfirgefa heimaland sitt eða lifði við erfiðar aðstæður. Portúgalskur gítar (guitarra portuguesa) er helsta hljóðfærið í fado fyrir utan rödd.

Aðalflytjendur: Kristjana Arngrímsdóttir, þjóðlagasöngkona og José Manuel Neto, portúgalskur gítar

Hljómsveitarmeðlimir og hljóðfæri:
Örn Eldjárn - gítar, söngur
Jón Rafnsson - bassi
Kristofer Rodríguez Svönuson - slagverk