Kian Soltani leikur Haydn - Sinfón­íu­hljóm­sveit Íslands

Sinfóníuhljómsveit Íslands

Hljómsveitarstjóri: Mirian Khukhunaishvili

Einleikari: Kian Soltani

Efnisskrá
Carl Maria von Weber Der Freischütz, forleikur
Joseph Haydn Sellókonsert nr. 1 í C-dúr
Pjotr Tsjajkovskíj Sinfónía nr. 5

Það er Sinfóníuhljómsveit Íslands sannkallað gleðiefni að fá sellóleikarann Kian Soltani að starfi sveitarinnar en hann er staðarlistamaður á þessu tónleikaári og heldur með hljómsveitinni í tónleikaferð til Evrópu vorið 2026. Kian galdrar fram einstakan tón úr sellóinu og hefur nánast fullkomin tök á túlkun sinni. Nákvæm færni hans nýtur sín frábærlega í háklassískum sellókonserti Haydns sem er bjart og fallegt tónverk og mikill gleðigjafi.

Konsertinn fer einkar vel við ástríðufulla fimmtu sinfóníu Tsjajkovskíjs en við smíð hennar var tónskáldinu umhugað um framvinduna í lífi manneskjunnar; hvort við séum fyllilega við stjórnvölinn og hvert sinnar gæfu smiður eða hvort örlögin móti okkar æviveg. Tsjajkovskíj var sjálfur þeirrar skoðunar að örlögin héldu um taumana og hefðu mikil áhrif á stormasamt tilfinninga líf hans. Þetta heyrist berlega í glæsilegri tónlistinni.

Á tónleikunum er tónninn gefinn með litríkum forleik Webers úr óperunni Der Freischütz, Töfraskyttunni. Þar er litrík tónlist full af eftirvæntingu og fyrirheitum og á því vel við í upphafi tónleikanna.