Mahler 8 - Sinfón­íu­hljóm­sveit Íslands

Sinfóníuhljómsveit Íslands

Hljómsveitarstjóri: Eva Ollikainen

Einsöngvarar:
Bryndís Guðjónsdóttir
Álfheidur Erla Guðmundsdóttir
Dísella Lárusdóttir
Anna Kissjudit
Hanna Dóra Sturludóttir
Simon O'Neill
Ólafur Kjartan Sigurðarson
Tómas Tómasson

Kórar:
Mótettukórinn
Hljómeyki
Söngsveitin Fílharmónía
Kór Langholtskirkju
Skólakór Kársness

Kórstjórar:
Stefan Sand
Magnús Ragnarsson
Álfheidur Björgvinndóttir

Efnisskrá: 
Gustav Mahler Sinfónía nr. 8

Flutningur á 8. sinfóníu Mahlers er án nokkurs vafa stórviðburður í íslensku tónlistarlífi og markar tímamót í sögu Sinfóníuhljómsveitar Íslands. Þetta stórvirki tónlistarsögunnar hefur aldrei áður verið flutt hér á landi og nú er öllu tjaldað til.

Sinfónían hlaut snemma viðurnefnið sinfónía þúsundanna þar sem flutningur hennar kallar á óvenjulegan fjölda flytjenda, jafnt söngvara sem hljóðfæraleikara. Á sviðinu verða á fjórða hundrað flytjendur, óvenjustór hljómsveit, átta einsöngvarar, kór og barnakór. Mahler samdi þetta áhrifaríka tónverk á aðeins sex vikum árið 1906, sem risavaxinn fagnaðaróð til kærleikans og mennskunnar, fullan bjartsýni og trúar á mannkynið. Mahler var sannfærður um að skilaboð verksins ættu erindi við heimsbyggðina og enn í dag er flutningur verksins í raun alþjóðlegur tónlistarviðburður í hvert sinn.

Þessir tónleikar verða einnig kveðjustund Evu Ollikainen sem aðalstjórnanda, en hún hefur verið aðalstjórnandi og listrænn stjórnandi Sinfóníuhljómsveitar Íslands frá árinu 2020.

Tónleikarnir eru samstarfsverkefni Listahátíðar í Reykjavík og Sinfóníuhljómsveitar Íslands.