Ingi­mar Ey­dal 90 ára

Hljómsveit Ingimars Eydal var um árabil ein vinsælasta danshljómsveit landsins auk þess að gefa út hljómplötur sem báru hróður hljómsveitarinnar langt út fyrir bækistöðvar hljómsveitarinnar á Akureyri. Spilagleði og vandvirkni einkenndi hljómsveitina og frábærir söngvarar voru ávallt í framlínunni á meðan hún starfaði. Þar má nefna Vilhjálm Vilhjálmsson, Þorvald Halldórsson, Bjarka Tryggvason, Helenu Eyjólfsdóttur, Ingu Eydal og Grím Sigurðsson sem dæmi. Auk þess skal sérstaklega nefna Finn Eydal en klarinett- og saxófónleikur hans vakti verðskuldaða athygli. Bræðurnir Eydal höfðu áður starfað saman í hinum vinsæla Atlantic kvartett sem gaf út hljómplötur sem nutu vinsælda.

Söngvararnir Sigríður Beinteinsdóttir, Stefán Hilmarsson, Matthías Matthíasson og Bjarni Arason flytja þekktustu lögin úr lagasafni Ingimars Eydal og félaga og má þar nefna: Í sól og sumaryl, Magga, Sumarást, Vor í Vaglaskógi, Á sjó og Hún er svo sæt sem dæmi. Með þeim leikur frábær hljómsveit undir stjórn Jóns Ólafssonar.

Sérstakir gestir eru fyrrum söngvarar hljómsveitarinnar þau Inga Eydal og Grímur Sigurðsson.

Ingimar Eydal var vinsæll tónlistarmaður og kennari og er nafn hans oftar en ekki tengt við skemmtistaðinn Sjallann á Akureyri en þar spilaði hljómsveit hans árum saman. Hljómsveitin var einnig dugleg að skemmta Íslendingum í sólarlöndum og þaðan rötuðu ýmis lög á plötur eins og María Ísabel og Viva Espana.

Kynnir er Jónatan Garðarsson.

Promoter

Dægurflugan