Múlinn er samstarfsverkefni Félags Íslenskra Hljómlistarmanna (FÍH) og Jazzvakningar. Klúbburinn heitir í höfuðið á Jóni Múla Árnasyni sem jafnframt var heiðursfélagi og verndari Múlans. Stofnár Múlans var haustið 1997 en fyrstu tónleikarnir fóru fram í ársbyrjun 1998.

Múlinn Jazzklúbbur vikulega í Hörpu nánast allt árið um kring.

Tónleikadagskrá Múlans sem er að öllu jöfnu bæði metnaðarfull og fjölbreytt er gott dæmi um þá miklu grósku sem einkennir íslenskt jazzlíf þar sem allir straumar og stefnur eiga heima. Áheyrendur geta hlustað á gæðajazz á góðu verði með frábæru útsýni yfir höfnina.

Stofnár Múlans var haustið 1997 en fyrstu tónleikarnir fóru fram í ársbyrjun 1998. Múlinn er styrktur af Reykjavíkurborg og Tónlistarsjóðnum og er í samstarfi við Heimstónlistarklúbbinn og Hörpu.

Miðaverð á tónleikana er 3.000 krónur, 2.000 krónur fyrir eldri borgara og öryrkja og 1500 fyrir nema.

Skipuleggjendur Múlans eru þeir Ólafur Jónsson og Haukur Gröndal.


Dagskrá - vetur 2021

Miðvikudagur 3. febrúar – Gammar, útgáfutónleikar Stefán S. Stefánsson, saxófónn Björn Thoroddsen, gítar Þórir Baldursson, píanó og orgel Bjarni Sveinbjörnsson, bassi Sigús Óttarsson, trommur Íslenska jazzrokksveitin Gammar hefur verið með fremstu sveitum sinnar tegundar um árabil. Hljómsveitin hefur verið atkvæðamikil í jazz-rokk tónlistinni á Íslandi og gefið út 3 hljómplötur með frumsömdu efni hljómsveitarmeðlima. Undanfarin misseri hefur hljómsveitin hljóðritað nýtt efni og var útgáfudagurinn 14. október s.l. á öllum helstu miðlum og eru þessir tónleikar í tilefni af því.

Miðvikudagur 10. febrúar – Ari Bragi Kárason kvintett Ari Bragi Kárason, trompet Ingimar Andersen, saxófónn Eyþór Gunnarsson, píanó Valdimar Kolbeinn Sigurjónsson, bassi Einar Scheving, trommur Á tónleikunum fær trompetleikarinn Ari Bragi Kárason með sér í lið þéttskipaðan hóp sem leikur jafnt í sókn og vörn. Á dagskrá hljómsveitarinnar eru lög úr ýmsum áttum jazzheimsins en auk þess sem leikin verða lög eftir Ara Braga. Kraftmikil og fjölbreytt dagskrá.

Miðvikudagur 17. febrúar – ADHD Óskar Guðjónsson, saxófónn Ómar Guðjónsson, gítar Tómas Jónsson, píanó Magnús Tryggvason Eliassen, trommur Þrátt fyrir undarlegt ástand síðustu misseri, þá hafa þeir félagar í ADHD ekki setið auðum höndum, hafa m.a. tekið upp nýtt efni á tilvonandi plötu og farið í hljómleikaferðalag um Þýskaland. Á efnisskránni verða lög, sum glæný, önnur eldri, en gaman er að segja frá því að þessi nýju lög koma út á plötu innan tíðar.

Miðvikudagur 24. febrúar – Kvartett Sigurðar Flosasonar spilar Charlie Parker Sigurður Flosason, saxófónn Kjartan Valdemarsson, píanó Þorgrímur Jónsson, bassi Einar Scheving, trommur Á tónleikunum mun kvartettinn hylla saxófónsnillinginn Charlie Parker, einn áhrifamesta jazztónlistarmann allra tíma, en hann hefði orðið 100 ára á síðasta ári. Fluttar verða þekktar tónsmíðar meistarans í bland við jazz standarda sem hann hljóðritaði.

Miðvikudagur 3. mars – Kvintett Andrésar Þórs Sigurður Flosason, saxófónn Andrés Þór Gunnlaugsson, gítar Agnar Már Magnússon, píanó Þorgrímur Jónsson, bassi Scott McLemore, trommur Gítarleikarinn Andrés Þór leiðir hér kvintett sinn sem er skipaður einvala liði hljóðfæraleikara í gegnum nýjar og nýlegar tónsmíðar sínar. Tónlistin sækir áhrif sín víðs vegar að, allt frá þjóðlagatónlist ýmiskonar til nostalgískrar rokktónlistar og er steypt í mót nýmóðins beinstefnujazztónlistar.