x checkmark sr arrow-right brouchure calendar check clock close compass conference download easel epal facebook food-and-shopping food fullscreen grid halls harpa-icon harpa sinfo instagram leaf like listi magnify mail menu minify minus move music opera pictures play plus qoute recording search select-alt select shopping simple-arrow-left simple-arrow-right sitemap telephone ticket twitter youtube spotify snapchat linkedin youtube

Múlinn Jazzklúbbur

Gæðajazz á góðu verði

Tónleikar á Múlanum

Múlinn Jazzklúbbur vikulega í Björtuloftum allt árið um kring.

Tónleikadagskrá Múlans sem er að öllu jöfnu bæði metnaðarfull og fjölbreytt er gott dæmi um þá miklu grósku sem einkennir íslenskt jazzlíf þar sem allir straumar og stefnur eiga heima. Áheyrendur geta hlustað á gæðajazz á góðu verði með frábæru útsýni yfir höfnina. Múlinn er samstarfsverkefni Félags Íslenskra Hljómlistarmanna (FÍH) og Jazzvakningar. Klúbburinn heitir í höfuðið á Jóni Múla Árnasyni sem jafnframt var heiðursfélagi og verndari Múlans. Stofnár Múlans var haustið 1997 en fyrstu tónleikarnir fóru fram í ársbyrjun 1998. Múlinn er styrktur af Reykjavíkurborg og Tónlistarsjóðnum og er í samstarfi við Heimstónlistarklúbbinn og Hörpu.

Miðaverð á tónleikana er 2.500 krónur en 1.500 krónur fyrir eldri borgara, nemendur og öryrkja.

Skipuleggjendur Múlans eru þeir Ólafur Jónsson og Haukur Gröndal.


Dagskrá - Haust 2019
2. október 2019: Andrés Þór kvartett leikur Paradox

Andrés Þór Gunnlaugsson, gítar
Agnar Már Magnússon, píanó
Þorgrímur Jónsson, bassi
Scott McLemore, trommur

Kvartett gítarleikarans Andrésar Þórs mun leika lög af glænýjum diski hans, Paradox sem var hljóðritaður á síðasta ári í Brooklyn í New York. Á disknum, sem er hans sjötta í röðinni, er að finna níu frumsamda jazzópusa sem sækja áhrif sín úr ýmsum áttum, allt frá þjóðlagatónlist til skammtafræði. Einnig munu þeir félagar frumflytja tvö ný lög í bland við efnisskrá plötunnar.

9. október: Hot Eskomos / Afmælisbörn

Karl Olgeirsson, píanó
Jón Rafnsson, bassi
Kristinn Snær Agnarsson, trommur

Jazztríóið Hot Eskimos mun brydda upp á þeirri nýbreytni að leika eingöngu lög eftir afmælisbörn dagsins. Þetta er dagurinn þegar kveikt er á friðarsúlunni í Viðey á hverju ári og verður John Lennon í heiðurssæti en einnig verður þar að finna lög samin af eða tengd PJ Harvey, Kenny Garrett, Bebo Valdés, Rod Temperton, Camille Saint-Saëns, Serge Gainsbourg, Abdullah Ibrahim, Steve McQueen og einni af fyrstu jazzsöngkonunum sem tóku upp plötur, Lee Whiley.

16. október – Roy Hargrove Tribute

Ari Bragi Kárason, trompet og flugelhorn
Kjartan Hákonarson, trompet og flugelhorn
Elísabet Eyþórsdóttir, söngur
Davíð Sigurgeirsson, gítar
Eyþór Gunnarsson, píanó
Tómas Jónsson, hljómborð
Jóhann Ásmundsson, bassi
Magnús Trygvason Eliassen, trommur

Trompetleikararnir Ari Bragi Kárason og Kjartan Hákonarson heiðra minningu trompetleikarans Roy Hargrove sem lést á árinu en á þessum degi hefði hann orðið 50 ára. Roy var frábær jazzspilari og einnig mjög virkur í funk- og neo-soultónlistar senunni og munu tónleikarnir því endurspegla fjölbreytta stíla. Þess má geta að Hargrove hefur verið mikill áhrifavaldur fyrir Kjartan og Ara og hefur þá félaga löngum dreymt að halda tónleika honum til heiðurs.

 

23. október – Stína Ágústsdóttir og Henrik Linder tríó

Stína Ágústsdóttir, söngur
Carl Mörner Ringstrom, gítar
Henrik Linder, bassi
Jonathan Lundberg, trommur

Stína Ágústsdóttir söngkona sem er búsett og starfandi í Stokkhólmi hefur tekist að fá með sér í lið tónlistarmenn frá Svíþjóð sem varla er hægt að fara orðum um, svo góðir eru þeir. Henrik Linder leikur með ofurhljómsveitinni Dirty Loops en þeir hafa gert garðinn frægan á heimsvísu fyrir fiman hljóðfæraleik og ótrúlegar útsetningar á þekktum popplögum. Ringström og Lundberg eru einnig á heimsmælikvarða og hafa báðir leikið með og lært af trommumeistaranum Virgil Donati. Saman munu þau leika þekkt klassísk jazzlög, lög eftir James Taylor í sínum útsetningum og sitt lítið af hverju kryddað með yfirnáttúrulegum bassasólóum og litríkum hljómsetningum.

Sænsk-íslenski samstarfssjóðurinn gerði hljómsveitinni kleift að halda í tónleikaferðalag til Íslands.


25. október – Piazzolla kvintett

Jón Þorsteinn Reynisson, harmonikka
Joaquin Páll Palomares, fiðla
Ásgeir Ásgeirsson, gítar
Jón Bjarnason, píanó
Alexandra Kjeld, bassi

Eins og nafn hljómsveitarinnar gefur til kynna þá leikur hún tónlist argentínska harmonikkusnillingsins Astor Piazzolla. Tónlist Piazzolla sem jafnan er nefnd hinn nýi tangó (nuevo tango) er afar áhugaverð samsuða af tangó, djass og klassískri tónlist – sem greinilega má heyra í verkum hans. Meðal verka á tónleikunum má nefna “Adios Nonino” sem Piazzolla samdi í minningu föður síns og hinn sívinsæla “Libertango” sem flestir ættu að kannast við. Að auki má nefna Árstíðirnar í Buenos Aires – verk í fjórum köflum sem túlkar árstíðirnar í argentínsku höfðuborginni.

 


30. október – Agnar Már Magnússon tríó – Ísaspöng af andans hyl

Agnar Már Magnússon, píanó
Valdimar Kolbeinn Sigurjónsson, bassi
Matthías MD Hemstock, trommur

Leiknar verða nýjar útsetningar af þjóðlögum og rímum útfærðar af Agnari fyrir píanótríó. Fyrir margt löngu gaf Agnar frá sér geisladiskinn Láð sem var að stórum hluta byggður á þjóðlegum tónlistararfi. Nú hefur hann tekið saman meira efni úr þeim ranni og útfært fyrir sama tríó og lék á Láði.


6. nóvember – Kvintett Sigurðar Flosasonar og Hans Olding


Nils Janson, trompet
Sigurður Flosason, saxófónn
Hans Olding, gítar
Þorgrímur Jónsson, bassi
Einar Scheving, trommur

Sigurður Flosason og Hans Olding hafa unnið saman nokkur undanfarin ár. Þeir hafa komið fram á tónleikum bæði hér á landi og í Svíþjóð og hafa auk þess sent frá sér plötu með eigin útsetningum af brasilískri tónlist. Hér bjóða þeir fram kvintett með framúrskarandi samverkamönnum frá báðum löndum og spennandi efnisskrá eigin verka.


8. nóvember – Bjarni Sveinbjörnsson og hljómsveit


Andrés Þór Gunnlaugsson, gítar
Agnar Már Magnússon, píanó
Bjarni Sveinbjörnsson, bassi
Benedikt Brynleifsson, trommur

Bjarni Sveinbjörnsson bassaleikari flytur eigin tónsmíðar ásamt hljómsveit. Tónlistin er bráðhressandi fönk-skotin bræðingur sem hressir, bætir og kætir.