Íslenska óperan

Íslenska óperan setur upp vandaðar og fjölbreyttar óperusýningar þar sem lögð er áhersla á íslenska listamenn, en jafnframt er erlendum listamönnum boðið að taka þátt í uppfærslum hennar.

Íslenska óperan var stofnuð árið 1980 af Garðari Cortes og var tilgangurinn með stofnun hennar að skapa vettvang svo að íslenskir söngvarar gætu sinnt list sinni og deilt óperulistforminu með íslensku þjóðinni.

Frá árinu 1982 átti Íslenska óperan samastað í Gamla Bíó en vorið 2011 síðan urðu kaflaskil í sögu hennar  þegar hún flutti inn í Hörpu og varð annar af föstum íbúum hússins ásamt Sinfóníuhljómsveit Íslands. Fyrsta óperuuppfærslan í Hörpu var Töfraflautan eftir W.A. Mozart sem var frumsýnd í október 2011.

Íslenska óperan hefur öðlast mikilvægan sess í menningarlífi þjóðarinnar. Hún hefur áunnið sér gott orðspor bæði innanlands og erlendis fyrir vandaða listviðburði sem standast alþjóðlegan samanburð.

Margir af helstu söngvurum landsins hafa tekið þátt í uppfærslum Íslensku óperunnar og hafa margir þeirra sem stigu sín fyrstu skref á fjölum Íslensku óperunnar síðar orðið þekktir og eftirsóttir söngvarar í hinum alþjóðlega óperuheimi.

Frá því að Íslenska óperan var stofnuð hafa rúmlega 400.000 manns séð sýningar hennar sem nálgast að vera orðnar 90 talsins. Verkefnavalið hefur verið mjög fjölbreytt, allt frá vel þekktum sígildum óperum til nýrra verka íslenskra og erlendra samtímatónskálda.

Starfsár Óperunnar hefst í september og stendur fram í júní. Frumsýndar eru í það minnsta tvær nýjar uppfærslur á hverju starfsári auk fræðslustarfs, samstarfverkefna og tónleikahalds.

Kúnstpásan eru hádegistónleikar sem haldnir eru mánaðarlega án endurgjalds. Þar koma fram margir af ástsælustu söngvurum þjóðarinnar ásamt þeim yngri sem eru að kynna sig til leiks á óperusviðinu og eru þeir jafnan mjög vel sóttir bæði af innlendum og erlendum gestum.

Sýningar Óperunnar, listamenn og hönnuðir hafa hlotið mörg verðlaun og viðurkenningar og má þar nefna óperuna Ragnheiði eftir Gunnar Þórðarson sem fékk Grímuna og var valin sýning ársins árið 2014 og hlaut 10 tilnefningar alls. Í fyrra hlaut uppfærsla Óperunnar á Évgeny Onegin eftir Tchaikovsky 5 stjörnu dóma bæði hér heima og í virtum erlendum fagtímaritum og var valin Tónlistarviðburður ársins 2017.

Síðasta uppfærsla ÍÓ á óperunni Tosca eftir Puccini hlaut frábærar viðtökur og 5 stjörnu dóma í innlendum og erlendum fjölmiðlum og fjölmargar tilnefningar til Íslensku tónlistarverðlaunanna.

Eftirfarandi uppfærslur hafa verið sýndar eftir að Íslenska óperan flutti í Hörpu:

Töfraflautan eftir Mozart

La Boheme eftir Puccini

Il trovatore eftir Verdi

Carmen eftir Bizet

Ragnheiður eftir Gunnar Þórðarsson

Don Carlo eftir Verdi

Peter Grimes eftir Britten

Rakarinn frá Sevilla eftir Rossini

Don Giovanni eftir Mozart

Évgení Onegin eftir Tchaikovsky

Mannsröddin eftir Poulenc

Tosca eftir Puccini

 

Næsta uppfærsla verður óperan Brothers eftir Daníel Bjarnason sem verður sýnd á Listahátíð í Reykjavík 9.júní 2018

 

Nánari upplýsingar um Íslensku óperuna er að finna á www.opera.is