x checkmark sr arrow-right brouchure calendar check clock close compass conference download easel epal facebook food-and-shopping food fullscreen grid halls harpa-icon harpa sinfo instagram leaf like listi magnify mail menu minify minus move music opera pictures play plus qoute recording search select-alt select shopping simple-arrow-left simple-arrow-right sitemap telephone ticket twitter youtube spotify snapchat linkedin youtube

Hönnunin

Arkitektar, hönnuðir, hljóðhönnuður og verktakar

Aðalhönnuðir Hörpu eru Henning Larsen Arkitektar í Kaupmannahöfn og Batteríið Arkitektar. Henning Larsen Arkitektar hafa hannað mörg sambærileg hús, þar má meðal annars nefna Óperuna í Kaupmannahöfn og Tónlistar- og ráðstefnuhúsið í Uppsölum. Ólafur Elíasson, í samvinnu við Henning Larsen Arkitekta, hannaði glerhjúpinn sem umlykur Hörpu. Eitt af megineinkennum hans er tilvísun í ýmis fyrirbæri úr náttúrunni og einstök birtuskilyrði landsins. Aðalverktaki var ÍAV.


Ólafur Elíasson

Ólafur Eliasson er fæddur árið 1967 í Kaupmannahöfn. Ólafur er heimsþekktur listamaður og hefur haldið fjölmargar sýningar víða um heim, bæði einn og í samstarfi við aðra. Hann býr í Kaupmannahöfn og Berlín.

„Þegar ég hannaði glerhjúp Hörpu með arkitektunum reyndi ég að búa til flöt sem myndi bæði bera vott um og verða hluti af íslensku umhverfi. Ég er stoltur af þátttöku minni í verkefninu og hef trú á því að Harpa muni marka leiðina að bjartari framtíð fyrir landið,“ sagði Ólafur Elíasson.

Ólafur Elíasson stundaði nám við Konunglega danska listaháskólann. Hann var fulltrúi Dana á 50. Feneyjatvíæringnum árið 2003 og setti síðar sama ár upp veðraverkefnið The weather project í Túrbínusalnum í Tate Modern listasafninu í Lundúnum. Könnunarsýningin Take your time: Olafur Eliasson, sem skipulögð var af Nútímalistasafni San Francisco-borgar fór víða fram til ársins 2010.

Einstaklingssýningin Innen Stadt Außen (Miðborgina út) opnaði í Martin-Gropius-Bau árið 2010, þar sem gjörningar víðsvegar um Berlín gáfu sýningunni almennari vídd. Ólafur hefur tekið þátt í ýmsum verkefnum á almannafæri, þar á meðal Green river (Græn á), í mörgum borgum á árunum 1998-2001, Pavilíón fyrir Serpentine Galleríið árið 2007, sem hann hannaði ásamt arkitektinum Kjetil Thorsen, og The New York City Waterfalls (fossarnir í New York), sem greitt var af opinberum listasjóði, Public Art Fund, árið 2008. Sem kennari við Listaháskóla Berlínar, stofnaði Ólafur Institut für Raumexperimente (Stofnun í rýmistilraunum) árið 2009.


Henning Larsen

Henning Larsen Arkitektar móta, gagnrýna og breyta umhverfinu, allt frá svæðisskipulagi til byggingarhönnunar og húsgagnahönnunar, sem tryggir notandanum sjálfbæra, áhugaverða og endingargóða hönnun. Henning Larsen Arkitektar leggja mikla áherslu á sjálfbærni. Það á við um form, efni og framleiðslu. Auk þess leggja þeir mikið upp úr notagildi rýma sem eru ætluð fyrir mannamót.

Þessi nálgun er grundvallaratriði í fjölda verkefna Henning Larsen Arkitekta um allan heim, hvort sem um er að ræða flókið svæðisskipulag eða smíði tilkomumikilla kennileita. Hugmyndir Henning Larsen Arkitekta spretta upp úr samtali við samstarfsaðila, viðskiptavini og notendur. Þannig tryggir starfsfólkið að byggingarnar verði nothæfar til framtíðar, sem er grundvöllur fyrir löngum líftíma.

henninglarsen.com


Batteríið Arkitektar

Batteríið Arkitektar var stofnað 1988 af Jóni Ólafi Ólafssyni og Sigurði Einarssyni og er ráðgjafafyrirtæki með reynslu af hönnun og skipulagi ýmiss konar bygginga. Batteríið hefur komið að margs kyns hönnunarverkefnum. Þar má nefna borgarskipulag, opinberar byggingar, menningar-, skrifstofu- og iðnaðarbyggingar, íþróttamannvirki, pósthús, banka, hótel, skóla, leikskóla, hitaveitu, auk íbúðarhúsnæðis, að ógleymdu skipulagi minni svæða, innanhúshönnun og endurbyggingu eða viðgerðum á sögufrægum húsum. Batteríið er nú með stærstu arkitektastofum landsins.


Artec Consultants

Artec Consultants í New York eru hljómburðarhönnuðir hússins. Fyrirtækið sem nú hefur sameinast öðru og heitir nú Arup Inc. Fyrirtækið hefur átt þátt í hönnun margra bygginga sem nú teljast til mikilfenglegustu kennileita heims. Þeir hönnuðir Artec sem aðallega komu að vinnunni í Hörpu voru Damian Doria, Tateo Nakajima, Edward Arenius, Christopher S. Darland, Larry King og Todd Brooks, en fyrirtækið býður m.a. upp á ráðgjöf í salahönnun og hljómburðarhönnun fyrir tónlistar- og leikhús.

Meðal þeirra húsa sem Artec hefur hannað má nefna menningar- og ráðstefnumiðstöðina í Lucerne í Sviss, Béla Bartók þjóðartónleikahúsið í Búdapest í Ungverjalandi, tónlistarhúsið í Lahti í Finnlandi, Sala São Paulo í São Paulo í Brasilíu og djasstónleikasal í Lincoln-miðstöðinni í New York í Bandaríkjunum.