x checkmark sr arrow-right brouchure calendar check clock close compass conference download easel epal facebook food-and-shopping food fullscreen grid halls harpa-icon harpa sinfo instagram leaf like listi magnify mail menu minify minus move music opera pictures play plus qoute recording search select-alt select shopping simple-arrow-left simple-arrow-right sitemap telephone ticket twitter youtube spotify snapchat linkedin youtube

Miðsala hafin á tónlistarhátíð Víkings Heiðars Ólafssonar

Reykjavík Midsummer Music 20. - 23. júní

Hin margverðlaunaða miðsumarhátíð Reykjavík Midsummer Music verður haldin í Hörpu í sjöunda sinn 20. – 23. júní 2019, en stofnandi hátíðarinnar og listrænn stjórnandi er Víkingur Heiðar Ólafsson.

Hátíðardagskráin hefur aldrei verið glæsilegri og meðal flytjenda eru nokkrir fremstu tónlistarmenn samtímans. Tónleikarnir verða að vanda litríkir og spennandi, þar sem tónlist ólíkra tíma fær að njóta sín í óvæntu samhengi.

Á meðal listamanna má nefna hið heimsfræga píanódúó hinna frönsku Labèque-systra sem kemur í fyrsta sinn fram á Íslandi, rússneska fiðluvirtúósinn Ilya Gringolts, fiðlu-og víóluséníð Yura Lee, austurríska barítónsöngvarann Florian Boesch sem er einn eftirsóttasti ljóðasöngvari heims um þessar mundir, klarínettuleikarann og tónskáldið Mark Simpson sem þykir eitt eftirtektarverðasta tónskáld Bretlandseyja og þýsku raftónlistargoðsögnina Hans-Joachim Roedelius.

Á hátíðinni verður boðið upp á ferna tónleika í Eldborg og Norðurljósum Hörpu. Tilkomumiklir upphafs- og lokatónleikar hátíðarinnar verða haldnir í Eldborg Hörpu og er það í fyrsta sinn í sögu RMM sem tvennir tónleikar eru haldnir þar.  Að auki verður boðið upp á innilega síðkvöldstónleika í Mengi í frábærri hliðardagskrá hátíðarinnar.

Líkt og endranær mun dagskrá Reykjavík Midsummer Music fléttast saman af gömlu og nýju enda hefur ferskt og frumlegt verkefnaval í flutningi úrvals tónlistarmanna verið eitt af aðalsmerkjum hátíðarinnar frá upphafi. Hverjir tónleikar segja einstaka sögu og mynda óvæntar tengingar og innbyrðis samhengi. Á hátíðinni verða flutt stórvirki úr smiðju Bachs og Brahms, Roberts Schumanns og György Kurtágs, Kaaiju Saariaho og Arvo Pärt og áfram má lengi telja. Efnisskrána má í heild sinni nálgast inni á vef hátíðarinnar.

Hægt er að kaupa miða hér fyrir neðan.

Hátíðarpassi (gildir á alla tónleika hátíðarinnar í Hörpu)

Stakir viðburðir:

Minning um Flórens – 20 júní kl. 20 í Eldborg

Skrifast á – 21 júní kl. 20 í Norðurljósum

Fiðrildi og fiðurfé – 22. júní kl. 20 í Norðurljósum

Lokatónleikar 2019 – 23. júní kl. 20 í Eldborg