x checkmark sr arrow-right brouchure calendar check clock close compass conference download easel epal facebook food-and-shopping food fullscreen grid halls harpa-icon harpa sinfo instagram leaf like listi magnify mail menu minify minus move music opera pictures play plus qoute recording search select-alt select shopping simple-arrow-left simple-arrow-right sitemap telephone ticket twitter youtube spotify snapchat linkedin youtube

Íslensku tónlistarverðlaunin

Fjölmargar tilnefningar tengdar Hörpu

Frá tónleikum Budapest Festival Orchestra og Iván Fischer í Eldborg

Í kvöld fer fram verðlaunahátíð Íslensku tónlistarverðlaunanna í Hörpu. Hátíðin verður í beinni sjónvarpsútsendingu á RÚV, en auk þess verður hægt að fylgjast með á Ruv.is.

Eins og fram kemur í tilkynningu frá hátíðinni, hefur íslensk tónlist blómstrað sem aldrei fyrr og ljóst er að tónlistarárið í fyrra var bæði glæsilegt, spennandi og fjölbreytt. Í ár verða veitt 37 verðlaun, auk Heiðursverðlauna Íslensku tónlistarverðlaunanna. Veitt verða verðlaun í flokki popp-, rokk-, hiphop- og raftónlistar, djass- og blústónlistar, sígildrar- og samtímatónlistar og í opnum flokki. Í þeim síðasta eru veitt verðlaun fyrir plötu ársins og fyrir leikhús- og kvikmyndatónlist, auk þjóðlagatónlistar.

Það er sannur heiður fyrir Hörpu að hýsa þessa glæsilegu hátíð, en undafarin ár hefur hún verið í Silfurbergi. Meðal hlutverka Hörpu er að styðja íslensku tónlistarsenuna en afrakstur þess má sjá í tilnefningum verðlaunanna þetta árið.

Í flokki sígildrar- og samtímatónlistar fær Budapest Festival Orchestra og Iván Fischer tilnefningu sem tónlistarviðburður ársins, fyrir tónleika sína í Eldborg í janúar 2018. Þetta er ekki eina tilnefningin sem tengist Hörpu í þessum flokki, því nánast allir tónlistarviðburðir í þessum tiltekna flokki fóru fram í Hörpu. Meðal þeirra er uppsetning Íslensku óperunnar á Brothers eftir Daníel Bjarnason, útgáfutónleikar Víkings Heiðar ánýjustu plötu sinni með verkum Bach, tónleikar Barokkbandsins Brákar; Spíralar Versala, Edda II: Líf guðanna með Sinfóníuhljómsveit Íslands og Schola Cantorum, og Íslendingasögur; Sinfónísk sagnaskemmtun, sem var sannkallaður hátíðarviðburður fullveldisafmælisins 1. desember í Eldborg.

Í flokknum Söngkona ársins eru þær Hallveig Rúnarsdóttir, Hanna Dóra Sturludóttir og Valgerður Guðnadóttir tilnefndar en tilnefndir söngvarar ársins eru Benedikt Kristjánsson, Eyjólfur Eyjólfsson og Oddur Arnþór Jónsson. Hanna Dóra og Oddur fengu mikið lof fyrir söng sinn í óperunni Brothers.

John Grant fær tilnefningu fyrir útgáfutónleika sína sem fóru fram í Silfurbergi, áður en hann lagði af stað í tónleikaferðalag um heiminn, sem stendur ennþá yfir.

Í flokki Djass og blús eru fjölmargir viðburðir og flytjendur sem geta kallað Hörpu heimilið sitt og fara þar fremst Stórsveit Reykjavíkur,Tónleikaraðir Jazzklúbbsins Múlans, og Blúshátíð í Reykjavík.

Þetta er einungis brot allra tilnefninga en sjá má þær allar hér.

Harpa óskar öllum þeim frábæru tónlistarmönnum sem hlotið hafa tilnefningu til Íslensku tónlistarverðlaunanna innilega til hamingju.