x checkmark sr arrow-right brouchure calendar check clock close compass conference download easel epal facebook food-and-shopping food fullscreen grid halls harpa-icon harpa sinfo instagram leaf like listi magnify mail menu minify minus move music opera pictures play plus qoute recording search select-alt select shopping simple-arrow-left simple-arrow-right sitemap telephone ticket twitter youtube spotify snapchat linkedin youtube

GoRed - Hjarta á hjúp Hörpu

Í samstarfi við Vetrarhátíð í Reykjavík stendur GoRed fyrir Hjartagöngu frá Skólavörðuholti að Hörpu föstudaginn 2. febrúar, á alþjóðlega GoRed deginum sem er vitundarvakning um hjartasjúkdóma kvenna. Lagt verður af stað frá Hallgrímskirkju kl. 20:00 og komið niður að Hörpu um kl. 20:30 þar sem ljósaverkið Hjarta verður afhjúpað. Höfundar þess eru Þórður Hans Baldursson og Halldór Eldjárn.

Föstudaginn 2. febrúar er GoRed dagurinn, alþjóðlegur dagur vitundarvakningar um hjartasjúkdóma kvenna. Að honum standa; Hjartadeildir Landspítala, Hjartavernd, Neistinn, Heilaheill, Hjartaheill og fagdeild hjartahjúkrunarfræðinga. Markmiðið er að vekja athygli á því að konur á öllum aldri geta ljóst, en ekki síður leynt, verið með hjartasjúkdóma sem sýna sig með ódæmigerðum hætti hjá konum og margir jafnvel einkennalausir.

Verkið, sem ber nafnið Hjarta, er gagnvirkt ljósaverk sem stjórnað er innan úr Hörpu. Stóru hring/hjartalaga formi er varpað á framhlið hjúpsins sem svo sendir frá sér mislitar ljósgárur í takt við hjartslátt fólks sem leggur fingur sína á þar til gerðar stöðvar sem eru staðsettar á 4. hæð, með útsýni yfir hjúpinn. Stöðvarnar eru þrjár talsins, merktar með mismunandi litum sem koma svo fram í gárunum sem birtast á hjúpnum. Þar með sjá notendur myndræna túlkun á eigin hjartslætti varpað yfir borgina. Verkið er unnið fyrir GoRed samtökin á 9 ára afmæli þeirra til þess að vekja sérstaka athygli á hjartaheilsu kvenna. 

Höfundar verksins, þeir Halldór og Þórður hafa brennandi metnað fyrir sköpun á gagnvirkum listaverkum. Halldór Eldjárn er tónlistarmaður og tölvunarfræðingur. Hann hefur gefið út tvær plötur með hljómsveit sinni Sykur ásamt því að hafa starfað með fjölda tónlistarmanna í gegnum tíðina. Helst ber að nefna í þessu samhengi gagnvirkan strengjakvartett sem hann vann í samstarfi við Úlf Eldjárn tónskáld og Sigurð Oddsson grafískan hönnuð. Þórður Hans er forritari sem komið hefur að gerð nokkurra gagnvirkra listaverka auk þess að hafa áður starfað fyrir íslenskt nýsköpunarfyrirtæki um nokkurt skeið. Í samstarfi sínu vinna þeir að því að blanda saman hugbúnaði, hönnun og tónlist til að skapa áhugaverðar og skemmtilegar upplifanir. Halldór og Þórður hafa áður unnið að ljósaverki á hjúp Hörpu, en tillaga þeirra Slettireka varð hlutskörpust í samkeppni um efnilegasta listaverkið sem nýtir sér ljósahjúp Hörpu og var frumsýnt á Vetrarhátíð 2016.