x checkmark sr arrow-right brouchure calendar check clock close compass conference download easel epal facebook food-and-shopping food fullscreen grid halls harpa-icon harpa sinfo instagram leaf like listi magnify mail menu minify minus move music opera pictures play plus qoute recording search select-alt select shopping simple-arrow-left simple-arrow-right sitemap telephone ticket twitter youtube spotify snapchat linkedin youtube

Una og Daníel – Sinfóníuhljómsveit Íslands

Á þessum tónleikum leikur Sinfóníuhljómsveit Íslands tvær sívinsælar sinfóníur auk þess sem nýr íslenskur fiðlukonsert heyrist í fyrsta sinn. Hinn ungi Sergei Prokofíev gaf fyrstu sinfóníu sinni viðurnefnið „Klassíska sinfónían“ enda sækir hann margt í smiðju Haydns og Mozarts þótt tónlistin hafi einnig yfir sér blæ 20. aldarinnar. Sinfónía nr. 2 eftir Johannes Brahms er sú ljúfasta sem hann samdi. Jón Ásgeirsson tónskáld hafði á orði að hún væri „sneisafull af þeim stefjum sem syngja sig inn í sál manns“. Þessar tvær björtu og glaðværu sinfóníur eru fullkominn upptaktur að góðu sumri.

Þuríður Jónsdóttir kannar nýja hljóðheima í verkum sínum sem hafa vakið alþjóðlega athygli á undanförnum árum. Mörg þeirra eru studd rafhljóðum, önnur innihalda leikræna tilburði, náttúruhljóð eða þátttöku áheyrenda. Eitt nýjasta verk hennar var frumflutt í Walt Disney Concert Hall í febrúar 2020 og hlaut frábæra dóma. 

Hér hljómar spánnýr fiðlukonsert sem hún samdi fyrir Unu Sveinbjarnardóttur, þriðja konsertmeistara Sinfóníuhljómsveitar Íslands. Una er landskunn fyrir innblásinn leik sinn, bæði sem sólisti og í strokkvartettinum Sigga sem vakið hefur verðskuldaða athygli. Þegar hún lék einleik með Sinfóníunni fyrir nokkrum árum sagði tónlistarrýnir Fréttablaðsins flutninginn hafa einkennst af „aðdáunarverðri fagmennsku, ljóðrænni innlifun og skáldskap, en einnig tæknilegum yfirburðum“.

Daníel Bjarnason hefur vakið verðskuldaða athygli á undanförnum árum bæði sem tónskáld og hljómsveitarstjóri. Hann hefur til dæmis nýverið stjórnað tónleikum með Fílharmóníusveitinni í Los Angeles, auk þess sem hann stýrði Sinfóníuhljómsveit Íslands á tónleikaferð hennar um Þýskaland og Austurríki haustið 2019 með frábærum árangri.

Kynnir á tónleikunum er Árni Heimir Ingólfsson og er þeim útvarpað beint á Rás 1.

Takmarkað sætaframboð á tónleikana
Í samræmi við sóttvarnarlög er sætaframboð á tónleikana takmarkað við 100 tónleikagesti í hverju sóttvarnarhólfi. Í það minnsta eitt autt sæti er á milli allra pantana til að tryggja nálægðarmörk milli gesta. Gestum ber skylda að vera með grímu á tónleikunum sem eru um klukkustundarlangir án hlés. Við biðjum gesti að gæta vel að sóttvörnum og kynna sér leiðbeiningar til tónleikagesta áður en mætt er í Hörpu. Stöndum saman, við erum öll almannavarnir.

  • Efnisskrá

    Sergej Prokofíev: Sinfónía nr. 1
    Þuríður Jónsdóttir: Fiðlukonsert, frumflutningur
    Johannes Brahms: Sinfónía nr. 2

    HLJÓMSVEITARSTJÓRI
    Daníel Bjarnason

    EINLEIKARI
    Una Sveinbjarnardóttir

    KYNNIR
    Árni Heimir Ingólfsson

Deila