x checkmark sr arrow-right brouchure calendar check clock close compass conference download easel epal facebook food-and-shopping food fullscreen grid halls harpa-icon harpa sinfo instagram leaf like listi magnify mail menu minify minus move music opera pictures play plus qoute recording search select-alt select shopping simple-arrow-left simple-arrow-right sitemap telephone ticket twitter youtube spotify snapchat linkedin youtube

Þúsund og ein nótt

Sinfóníuhljómsveit Íslands

EFNISSKRÁ
Elizabeth Ogonek All These Lighted Things
Béla Bartók Píanókonsert nr. 1
Nikolaj Rimskíj-Korsakov Sheherazade

HLJÓMSVEITARSTJÓRI
Elim Chan

EINLEIKARI
Tamara Stefanovich

Tónleikakynning í Hörpuhorni kl. 18:00.

Á þessum tónleikum Sinfóníuhljómsveitar Íslands flytur Tamara Stefanovich með hljómsveitinni píanókonsert nr. 1 eftir Bartók, verk frá árinu 1926 sem hljómar nú í fyrsta sinn á Íslandi. Tamara Stefanovich er einn helsti flytjandi samtímatónlistar fyrir píanó í heiminum í dag. Breska dagblaðið The Guardian valdi einleikstónleika hennar í Lundúnum meðal þriggja hápunkta tónlistar á árinu 2019 og sagði meðal annars: „Þessir tónleikar voru stórkostlegt afrek, bæði hvað snertir ímyndunarafl, tónlistargáfur eða tæknilega yfirburði.“ Íslenskir tónleikagestir muna eftir því þegar Stefanovich hljóp í skarðið og lék krefjandi einleikskonsert Ligetis með Sinfóníuhljómsveit Íslands með aðeins örfárra daga fyrirvara árið 2014, þá komin átta mánuði á leið.

Elim Chan hefur skotist upp á stjörnuhimin tónlistarinnar með ógnarhraða undanfarin ár. Hún er fædd í Hong Kong en lærði hljómsveitarstjórn í Bandaríkjunum, varð fyrst kvenna til að vinna Flick-stjórnandakeppnina og er nú aðalstjórnandi Sinfóníuhljómsveitarinnar í Antwerpen.

Rimskíj-Korsakov var einn snjallasti útsetjari tónlistarsögunnar. Hvergi nýtur sú gáfa hans sín betur en í hinu litríka hljómsveitarverki Sheherazade, sem byggir á ævintýrum úr Þúsund og einni nótt. Soldán nokkur er sannfærður um að allar konur séu svikular, og strengir þess heit að festa sér nýja brúði hvern dag og taka hana af lífi að morgni. Hin fagra Sheherazade bjargar lífi sínu með því að segja manni sínum sögur, og í þúsund og eina nótt þylur hún hin ýmsu ævintýri soldáninum til skemmtunar.

Einnig hljómar verk sem bandaríska tónskáldið Elizabeth Ogonek samdi fyrir Sinfóníuhljómsveitina í Chicago, en þar er hún staðartónskáld. Verkið ber undirtitilinn „Þrír litlir dansar fyrir hljómsveit“ og segist tónskáldið í því hafa viljað „tjá hluti sem færa heiminum gleði“.

Nánar um tónleikana á vef hljómsveitarinnar.

Deila