x checkmark sr arrow-right brouchure calendar check clock close compass conference download easel epal facebook food-and-shopping food fullscreen grid halls harpa-icon harpa sinfo instagram leaf like listi magnify mail menu minify minus move music opera pictures play plus qoute recording search select-alt select shopping simple-arrow-left simple-arrow-right sitemap telephone ticket twitter youtube spotify snapchat linkedin youtube

Múlinn Jazzklúbbur – Stórsveit Reykjavíkur kynnir Spilað úr skápnum

Þessi viðburður er liðinn

Jazzklúbburinn Múlinn hefur spennandi sumardagskrá sína með tónleikum Stórsveitar Reykjavíkur, föstudagskvöldið 19. júní kl. 20, í Flóa á jarðhæð Hörpu.

Á tónleikunum mun stórsveitin opna nótnaskápa sína upp á gátt og draga fram ólíkar útsetningar frá ýmsum tímum sem ekki hafa verið leiknar nýverið. Þannig kemur Stórsveit Reykjavíkur út úr kófinu og fagnar sumri.

Stórsveit Reykjavíkur hefur alla tíð leitast við að hafa verkefnaval sitt fjölbreytt. Auk nýrrar tónlistar, bæði innlendrar og erlendrar, hefur hljómsveitin flutt sögulegar efnisskrár tengdar einstökum höfundum og hljómsveitum. Hún hefur einnig átt mikið og farsælt samstarf við fjölmarga íslenska söngvara úr heimi popptónlistarinnar.

Stórsveit Reykjavíkur var stofnuð í febrúar árið 1992 og á sér því langa og farsæla sögu. Aðal hvatamaður að stofnun hljómsveitarinnar var Sæbjörn Jónsson og var hann jafnframt aðalstjórnandi Stórsveitarinnar fram til árins 2000. Síðan þá hefur sveitin starfað án fasts aðalstjórnanda en fengið til liðs við sig fjölmarga innlenda og erlenda stjórnendur.

Stórsveit Reykjavíkur hefur fengið afbragðs dóma gagnrýnenda fyrir leik sinn. Sveitin hlaut Íslensku Tónlistarverðlaunin 2005 sem jazzflytjandi ársins og 2011 fyrir jazzplötu ársins. Stórsveitin hefur sent frá sér átta geisladiska í eigin nafni, auk þess að koma fram á nokkrum diskum annarra flytjenda.

Stórsveit Reykjavíkur nýtur stuðnings Reykjavíkurborgar og Tónlistarsjóðs. Stórsveit Reykjavíkur er einn af íbúum Hörpu.

Tónleikadagskrá Múlans sem er að öllu jöfnu bæði metnaðarfull og fjölbreytt er gott dæmi um þá miklu grósku sem einkennir íslenskt jazzlíf þar sem allir straumar og stefnur eiga heima. Áheyrendur geta hlustað á gæðajazz á góðu verði með frábæru útsýni yfir höfnina. Múlinn er samstarfsverkefni Félags Íslenskra Hljómlistarmanna (FÍH) og Jazzvakningar. Klúbburinn heitir í höfuðið á Jóni Múla Árnasyni sem jafnframt var heiðursfélagi og verndari Múlans. Stofnár Múlans var haustið 1997 en fyrstu tónleikarnir fóru fram í ársbyrjun 1998. Múlinn er styrktur af Reykjavíkurborg og Tónlistarsjóðnum og er í samstarfi við Heimstónlistarklúbbinn og Hörpu.

Miðaverð á tónleikana er 3.000 krónur, 2.000 krónur fyrir eldri borgara og öryrkja og 1500 fyrir nema.

Skipuleggjendur Múlans eru þeir Ólafur Jónsson og Haukur Gröndal.

Dagskrá Múlans Jazzklúbbs sumarið 2020

19.06.2020 Stórsveit Reykjavíkur

26.06.2020 Bara gaman

03.07.2020 Skuggamyndir frá Býsans

10.07.2020 – Þorgrímur Jónsson kvartett

17.07.2020 ASA tríó ásamt Jóel Pálssyni 

24.07.2020 ADHD

31.07.2020 Kvartett Sigurðar Flosasonar

07.08.2020 Bölvað braz með Ife Tolentino

14.08.2020 Karl Orgeltríó