x checkmark sr arrow-right brouchure calendar check clock close compass conference download easel epal facebook food-and-shopping food fullscreen grid halls harpa-icon harpa sinfo instagram leaf like listi magnify mail menu minify minus move music opera pictures play plus qoute recording search select-alt select shopping simple-arrow-left simple-arrow-right sitemap telephone ticket twitter youtube spotify snapchat linkedin youtube

Sólin á þig geislum helli

Einsöngstónleikar

Þér er boðið á tónleika í Hörpuhorni með Hólmfríði Jóhannesdóttur mezzósópran, Victoriu Tarveskaia sellóleikara og Jóni Sigurðssyni píanóleikara.

Flutt verða lög eftir Atla Heimi Sveinsson við kvæði Jónasar Hallgrímssonar ásamt íslenskum þjóðlögum. Tónleikarnir hefjast kl 14.30 og standa í 45 min án hlés.

Aðgangur er ókeypis!

Jónas Hallgrímsson var náttúruvísindamaður og skáld og dvaldi löngum í Kaupmannahöfn við nám og störf. Þar var hann evrópskur menntamaður, sálufélagi Goethes og Schillers, en þó var hann alltaf norðlenskur sveitapiltur. Hann var glöggskyggn á samtímabókmenntir og var með þeim fyrstu sem þýddu og staðfærðu verk H.C. Andersens.

Atli Heimir Sveinsson var óróaseggurinn í íslenskri tónsköpun á sjöunda og áttunda áratugnum, ef til vill sá eini í tónlistarsögu okkar sem á það fyllilega skilið að vera nefndur ‘enfant terrible‘, segir Dr. Árni Heimir Ingólfsson. Á milli þess sem hann hneykslaði Íslendinga með brjáluðum tilraunaverkum, yljaði hann þeim um hjartarætur með yndisfögrum laglínum, sem enginn vildi vera án. Jafnframt má segja að hann bregði sér í líki Schuberts þegar hann semur lög við kvæði Jónasar Hallgrímssonar.

Hólmfríður Jóhannesdóttir mezzósópran lauk 8. stigi í söng frá Söngskólanum í Reykjavík og hélt sama ár til Vínar í frekara nám í Konservatorium. Leið hennar lá síðar til Ítalíu þar sem hún nam óperusöng og leiklist. Hólmfríður hefur komið fram á fjölda ljóða og óperutónleikum hér heima og erlendis og verið starfandi óperusöngkona í Austurríki og í Þýskalandi.

Jón Sigurðsson lauk meistaraprófi í píanóleik frá Arizona State University í Bandaríkjunum. Hann hefur haldið einleikstónleika regulega og komið fram með fjölmörgum hljóðfæraleikurum og söngvurum. Polarfonia Classics hefur gefið út tvo geisladiska þar sem Jón leikur m.a. verk eftir Scriabin, Barber, Schumann, Mozart og Strauss.

Victoria Tarevskaia stundaði tónlistarnám í Special Musical School E. Koka í Chisinau í Moldavíu. Hún nam síðan í Conservatiore N. Rimsky-Korsakov í Sankti Pétursborg og útskrifaðist árið 1994 með Meistaragráðu í Sellóleik frá Tónlistarakademíu G Musicescu í Chisinau. Hún var fulltrúi Moldavíu í International Black Sea Chamberg Orchestra. Hún hefur spilað með fjölda söngvara og kórum, Sinfoníuhljómsveit Íslands og Norðurlands.