Mikael Máni Trio – Útgáfutónleikar

Þann 9. júní verður útgáfa af fyrstu hljómplötu tríó Mikaels Mána fagnað með tónleikum í Kaldalóni.

Gítarleikarinn Mikeal Máni hafði ungur mikinn áhuga á tafli og varð ævisaga Bobby Fischer, Endatafl, kveikjan að hugmyndinni á bak við plötuna. Lögin eru skáldlegar túlkanir á köflum úr ævisögunni en á sama tíma fangar hvert lag almenna eiginleika í mannlegu eðli sem flestir hafa upplifað á einhverjum tímapunkti.

Þetta heildræna listaverk er hugrænn taflleikur sem ber með sér ferskan blæ inn á jazz senuna. Verkefnið var unnið með ást á textum og jazz að leiðarljósi og blandar saman vitsmunalegri hljóðfæratónlist við einlægni söngvaskálds.

Tríóið samanstendur af 3 íslenskum tónlistarmönnum af mismunandi kynslóðum. Skúli Sverrisson spilar á bassa og Magnús Trygvason Elíassen spilar á trommur og víbrafón. Tónlistin leitar í jazz en hún er undir áhrifum frá mörgum öðrum stílum t.d. post rokki og kvikmyndatónlist, svolítið eins og ef Bill Evans hefði hlustað á Sigur Rós.

Upphitun verður í höndum Lilju Maríu Ásmundsdóttur, píanóleikara sem mun leika verk eftir John Cage sem er byggt á málverki sem hann gerði af taflborði.
-Miðaverð á tónleikana er 2.900 krónur.
-Þúsund króna aflsáttur fyrir nemendur, eldri borgara og öryrkja. Aðeins afgreitt í miðasölu Hörpu.
Tónleikarnir eru styrktir af Ýli.