x checkmark sr arrow-right brouchure calendar check clock close compass conference download easel epal facebook food-and-shopping food fullscreen grid halls harpa-icon harpa sinfo instagram leaf like listi magnify mail menu minify minus move music opera pictures play plus qoute recording search select-alt select shopping simple-arrow-left simple-arrow-right sitemap telephone ticket twitter youtube spotify snapchat linkedin youtube

Mahler og Debussy – Sinfóníuhljómsveit Íslands

Glæsileg tónlist tengd hafinu og vorinu hljómar á þessum tónleikum Sinfóníuhljómsveitar Íslands undir stjórn finnska hljómsveitarstjórans Hannu Lintu. Hann er aðalstjórnandi Útvarpshljómsveitarinnar í Helsinki og hefur áður stjórnað Sinfóníuhljómsveit Íslands með stórkostlegum árangri. „Undir stjórn Hannu Lintu fékk Sinfóníuhljómsveit Íslands að láta öll blæ-, styrk- og litbrigði njóta sín; flutningurinn var allan tímann stórskemmtilegur og spennandi“ sagði tónleikarýnir Morgunblaðsins um flutning hans á sinfóníum Beethovens í Hörpu árið 2011.

Hin franska Lili Boulanger lést aðeins 24 ára gömul árið 1918 en hafði þá þegar samið glæsileg tónverk, meðal annars hina ljúfu vorstemningu sem hljómar í upphafi tónleikanna. Des Knaben Wunderhorn, eða Drengsins nægtahorn, er heiti á safni þýskra þjóðkvæða sem gefið var út árið 1805. Fjölmörg tónskáld sömdu lög við kvæðin en ekkert sótti þangað innblástur í sama mæli og

Gustav Mahler, en söngvaflokkur hans er sannkallað meistaraverk. Tónlistin og textarnir spanna allt frá ástarsorg til stríðsátaka, eru ýmist kaldhæðin, bitur, glaðvær eða íhugul.

Hafið er í forgrunni á síðari hluta tónleikanna. Sjávarmyndir Brittens eru röð hljómsveitarþátta úr hinni mögnuðu óperu Peter Grimes, þar sem sjómaður tekst á við eigin breyskleika og óvild samfélags í enskum sjávarbæ. La mer er hið mikilfenglegasta af hljómsveitarverkum Debussys, eins konar sinfónía um hafið, vindinn og öldurnar. Í þessu verki fær hljómsveitin að sýna allar sínar bestu hliðar.

Bandaríska mezzósópransöngkonan Michelle DeYoung er einstaklega innblásinn túlkandi og sérhæfir sig meðal annars í tónlist Mahlers. Hún hefur sungið við Metropolitan-óperuna og Covent Garden og kemur reglulega fram með fremstu sinfóníuhljómsveitum heims, til dæmis Concertgebouw-hljómsveitinni í Amsterdam og Staatskapelle Berlin undir stjórn Daniels Barenboim.

EFNISSKRÁ
Lili Boulanger D’un matin de printemps
Gustav Mahler Söngvar úr Des Knaben Wunderhorn
Benjamin Britten Sea Interludes úr Peter Grimes
Claude Debussy La mer

HLJÓMSVEITARSTJÓRI
Hannu Lintu

EINLEIKARI
Michelle DeYoung

Tónleikakynning í Hörpuhorni » 21. feb. kl. 18:00