x checkmark sr arrow-right brouchure calendar check clock close compass conference download easel epal facebook food-and-shopping food fullscreen grid halls harpa-icon harpa sinfo instagram leaf like listi magnify mail menu minify minus move music opera pictures play plus qoute recording search select-alt select shopping simple-arrow-left simple-arrow-right sitemap telephone ticket twitter youtube spotify snapchat linkedin youtube

Kvartett Einars Scheving / Melissa Aldana / SJS Big Band – Legoland 20 ára

Jazzhátíð Reykjavíkur 30 ára

Glæsileg tónleikaþrenna í Norðurljósum slær botninn í Jazzhátíð Reykjavíkur. Tónleikarnir fara fram kl. 19:30, 21:00 og 22:30 og einn miðapassi (8000 kr) gildir á alla tónleikana.

19:30 – Kvartett Einars Scheving

Kvartett Einars Scheving hefur á undanförnum árum fest sig í sessi sem ein fremsta hljómsveit íslenskrar djasssenu. Kvartettinn gaf út sína fjórðu plötu, Mi Casa, Su Casa, á síðasta ári og hlaut Einar sín fjórðu tónlistarverðlaun í kjölfarið – í þetta sinn sem Tónhöfundur ársins fyrir tónlistina á plötunni. Meðlimi kvartettsins þarf vart að kynna, en þeir eru, auk Einars, sem leikur á trommur og slagverk, bassaleikarinn Skúli Sverrisson, píanóleikarinn Eyþór Gunnarsson og saxafónleikarinn Óskar Guðjónsson. Munu þeir félagar leika blandað efni af plötum kvartettsins.

KVARTETT EINARS SCHEVING:

Einar Scheving: trommur
Skúli Sverrisson: bassi
Eyþór Gunnarsson: píanó
Óskar Guðjónsson: saxófónn

21:00 – Melissa Aldana

Saxófónsnillingurinn Melissa Aldana kemur fram á 30 ára afmæli Jazzhátíðar Reykjavíkur en kvartett hennar leikur í Norðurljósum 5. september næstkomandi. Auk hennar skipa kvartettinn þeir Pablo Menares á bassa, Kush Abadey á trommur og Lage Lund á gítar.

Á nokkrum árum hefur frægðarsól Melissu Aldana risið hratt og er hún nú talin í fremstu röð tenórsaxófónleikara í jazzgeiranum. Hún er upprunalega frá Chile og eftir að hún útskrifaðist frá Berklee College of Music í Boston vakti hún strax mikla eftirtekt þegar fyrsta plata hennar, Free Fall, kom út árið 2010. Á þeirri skífu var tignarleg, en jafnframt kraftmikil spilamennska hennar fyrirferðarmikil en einnig snilldarlega útfærðar tónsmíðar. Hún var fyrsta konan, og reyndar fyrsti tónlistarmaðurinn frá Suður-Ameríku til að vinna hina frægu „Thelonious Monk Jazz Saxophone“ keppni en með þeim sigri árið 2013 má segja að Melissa Aldana hafi komist almennilega á kortið í heimi jazzsaxófónsins.

Á nýjustu plötu sinni, Visions, sækir hún innblástur í uppruna sinn og arfleifð listakvenna frá Rómönsku Ameríku, ekki síst Fridu Kahlo. Platan kom út þann 24. maí síðastliðinn en á henni leika ásamt Melissu þeir Sam Harris á píanó, Pablo Menares á bassa, Tommy Crane á trommur og Joel Ross á víbrafón.

Það er mikill fengur fyrir jazzáhugafólk og áhugafólk um tónlist almennt að fá tækifæri til að hlýða á þessa stórkostlegu tónlistarkonu og hljómsveit hennar á Jazzhátíð.

MELISSA ALDANA KVARTETT:

Melissa Aldana: tenór saxófónn
Pablo Menares: bassi
Kush Abadey: trommur
Lage Lund: gítar

22:30 – SJS Big Band – Legoland 20 ára

Legoland 20 árum síðar á Jazzhátíð Reykjavíkur

Stórsveit Samúels Jón Samúelssonar kom fyrst fram opinberlega á Jazzhátíð Reykjavíkur árið 2000 þar sem sveitin flutti tónlist af hljómplötunni Legoland sem var hljóðrituð á burtfarartónleikum Samúels frá Tónlistarskóla FÍH fyrr það sama ár.

Hljómsveitin lagðist svo í dvala í nokkur ár á meðan Samúel og félagar hans í hljómsveitinni Jagúar spiluðu vítt og breitt um heiminn og sendu frá sér 5 hljómplötur á árunum 1999-2007.

Eftir að hafa frumflutt efnisskrá undir nafninu Fnykur með Stórsveit Reykjavíkur 2006 endurreisti Samúel svo sveit sína sem Samúel Jón Samúelsson Big Band árið 2007 með nýrri plötu og spilamennsku innanlands og utan.

SJS Big Band, sem á árunum 2007-2014 var árlegur gestur á Jazzhátíð, snýr nú aftur og mun endurvekja efnisskrá Legolands sem hefur ekki verið flutt í heild í 20 ár. Þetta verður viðeigandi flugeldasýning til að loka 30 ára afmæli Jazzhátíðar Reykjavíkur 2020. Ekki vera skver, mættu í gleðina!

https://reykjavikjazz.is/