x checkmark sr arrow-right brouchure calendar check clock close compass conference download easel epal facebook food-and-shopping food fullscreen grid halls harpa-icon harpa sinfo instagram leaf like listi magnify mail menu minify minus move music opera pictures play plus qoute recording search select-alt select shopping simple-arrow-left simple-arrow-right sitemap telephone ticket twitter youtube spotify snapchat linkedin youtube

Inkinen stjórnar Bartók – Sinfóníuhljómsveit Íslands

Breska tónskáldið Anna Clyne hefur vakið heimsathygli á síðustu árum fyrir tónlist sína. Tímaritið Time Out New York kallar verk hennar „stórfenglega hugmyndarík“ og hljómsveitarstjórinn Riccardo Muti segir þau koma „beint frá hjartanu“. Clyne var tilnefnd til Grammy-verðlauna árið 2015 og var staðartónskáld Chicago-sinfóníunnar um fimm ára skeið. Hér hljómar sprellfjörugur og áheyrilegur forleikur sem hún samdi fyrir Proms-tónlistarhátíðina árið 2013. Innblástur sækir hún í glaðværa danstónlist fyrri alda og eitt meginstef verksins er enskur sveitadans frá 17. öld.

Víólukonsert Williams Walton frá árinu 1929 er lykilverk sinnar gerðar og festi höfundinn í sessi sem eitt helsta tónskáld Bretlandseyja. „Hann er fæddur snillingur“ sagði einn gagnrýnandi eftir frumflutninginn. Konsert fyrir hljómsveit var eitt síðasta verkið sem Béla Bartók lauk við áður en hann lést árið 1945. Í konsertinum sýnir hann allar hliðar hljómsveitarinnar á glæsilegan hátt enda er þetta eitt dáðasta hljómsveitarverk 20. aldar.

„Hann er poppstjarnan meðal víólusnillinga okkar daga“, fullyrðir gagnrýnandi tónlistarvefsins Klassik.com um hinn þýska Nils Mönkemeyer, sem er tvímælalaust einn fremsti víóluleikari sinnar kynslóðar. Undanfarin ár hefur Mönkemeyer hlotið mikið lof fyrir hljómdiska sína hjá Sony Classical, meðal annars upptöku á víólukonserti Waltons. Sá diskur hlaut Þýsku gagnrýnendaverðlaunin 2018 og rýnir BBC Music jós lofi á „dásamlega tæran“ flutning sem væri til skiptis kraftmikill og angurvær.

Finnski hljómsveitarstjórinn Pietari Inkinen er íslenskum áheyrendum að góðu kunnur og hefur stýrt mörgum eftirminnilegum tónleikum með Sinfóníuhljómsveit Íslands. Nýverið tók hann við stöðu aðalstjórnanda hjá Þýsku útvarpsfílharmóníunni auk þess sem hann stjórnar Fílharmóníusveitinni í Japan og er fastagestur við margar fremstu hljómsveitir heims.

EFNISSKRÁ
Anna Clyne Masquerade
William Walton Víólukonsert
Béla Bartók Konsert fyrir hljómsveit

HLJÓMSVEITARSTJÓRI
Pietari Inkinen

EINLEIKARI
Nils Mönkemeyer

Tónleikakynning í Hörpuhorni » 23. jan. kl. 18:00