Cauda Collective

Cauda Collective er tónlistahópur sem hefur það að markmiði að blanda saman klassískri kammertónlist við nýja tónlist og flétta saman við önnur listform. Á þessum tónleikum skipa hópinn þær Hulda Jónsdóttir, fiðla, Sigrún Harðardóttir, fiðla, Þóra Margrét Sveinsdóttir, víóla, Þórdís Gerður Jónsdóttir, selló, Björk Níelsdóttir, sópran og Jane Ade Sutarjo, píanó.

Um útlit og hönnun sér Eva Björg Harðardóttir. Tónleikarnir bera yfirskriftina Ástarjátning enda tengjast verkin öll á einn eða annan hátt ástinni.

György Ligeti
Sónata fyrir selló
Dialogo – Adagio, rubato, cantabile (1948-1953)

Halldór Smárason
Nýtt verk (2018)
Frumflutningur

Ernest Chausson
Chanson perpétuelle (1898) fyrir sópran og píanókvintett

Leoš Janáček
Strengjakvartett nr. 2 Intimate letters (1928)

Sellósónata Ligetis er eitt elstu verkum tónskáldsins en verkið samdi hann þegar hann var um það bil að ljúka námi og hafði þá þegar búið sér til gott orðspor sem fyrirmyndarnemandi. Sónötuna skrifaði hann fyrir kvenkyns samnemanda sinn í tónlistarakademíunni í Búdapest, Annuss Virány, sem Ligeti var ástfanginn af á laun. Virnáy sagðist aldrei hafa vitað af hverju Ligeti gaf henni verkið, hún þakkaði honum bara fyrir og spilaði verkið aldrei. Verkinu lýsir Ligeti sjálfur sem samtali milli manns og konu, hann leikur sér með misjafna áferð C og G strengjanna sem túlka raddir hans og hennar.

Verk Ernest Chausson, Chanson perpétuelle, var tileinkað söngkonunni Jeanne Raunay, sem frumflutti það í janúar 1899. Hálfu ári síðar lést Chausson af slysförum. Verkið var ekki gefið út fyrr en árið 1911. Texti verksins er eftir Charles Cros, en þar lýsir kona elskhuga sínum sem yfirgaf hana. Hún biður vindana að skila því til hans að hún sé að deyja. Hún minnist þess þegar hann kyssti hana á ennið og allt breyttist og hún varð að eilífu hans. En svo varð hjartað hans kalt og hann yfirgaf hana til að ferðast á fjarlægar slóðir. „Ég mun deyja í tjörninni, innan um blómin, undir sofandi vatninu“, segir hún. „Megi minn síðasti andardráttur berast með vindinum, fljúga eins og fiðrildi á varir elskhuga míns“.

Annar strengjakvartett Leoš Janáček var nefndur af tónskáldinu sjálfu „Intimate Letters“. Verkið var innblásið af langri og innilegri vináttu hans og Kamila Strösslová, giftri konu sem var 38 árum yngri en hann. Strengjakvartettinn endurspeglar eðli sambands þeirra, en þau skiptust á um 700 bréfum við hvort annað. „Þú stendur að baki hverrar nótu, þú, lifandi, kraftmikil, elskandi. Ilmur líkama þíns, ljómi kossa þinna – nei, eiginlega minna. Nóturnar mínar kyssa þig alla. Þær kalla á þig af ástríðu“. Verkið var frumflutt 11. september 1928, mánuði eftir að Janáček lést.

Cauda Collective er tónlistahópur sem hefur það að markmiði að blanda saman klassískri kammertónlist við nýja tónlist og flétta saman við önnur listform. Cauda Collective er í grunninn strengja-dúó, skipað Sigrúnu Harðardóttur og Þórdísi Gerði Jónsdóttur. Hópurinn tekur á sig ýmsar myndir, stækkar og teygir sig í ýmsar áttir, allt eftir verkefnavali hverju sinni.

Í starfi hópsins er leitað skapandi leiða til að miðla tónlist og brjóta upp hefðbundna tónleikaformið svo að útkoman verði áhugaverð fyrir áhorfendur og flytjendur en þó alltaf með það að leiðarljósi að þjóna tónlistinni. Hlutverki tónlistarflytjandans er ögrað, hann semur líka tónlist, útsetur, spinnur og vinnur þvert á miðla. Á tónleikum Cauda Collective er alltaf frumflutt a.m.k. eitt nýtt tónverk.

Tónleikarnir eru styrktir af tónlistarsjóði SUT og Ruthar Hermanns og starfslaunasjóði listamanna.

Tónleikarnir fara fram innan tónleikaraðarinnar Sígildir sunnudagar í Hörpu 2019 – 2020.

Dagskrá Sígildra sunnudaga veturinn 2019 – 2020

Dagskrá Sígildra sunnudaga veturinn 2019 – 2020

September 2019

Október 2019

Nóvember 2019

Desember 2019

Janúar 2020

Febrúar 2020

Mars 2020

Apríl 2020

Maí 2020