Ást og hatur – söngtónleikar

Þessi viðburður er liðinn

Á þessum tónleikum verða fluttar aríur og dúettar eftir Gaetano Donizetti og Giuseppe Verdi. Hér eigast við sópran og baríton í hlutverkum bróður og systur, föður og unnustu og föður og dóttur. Þessir dúettar eru oftar en ekki vendipunktur í óperunni þar sem örlögin ráðast og ekki verður aftur snúið. Aríur sem fluttar verða eftir sömu höfunda eru einnig um ólgandi ástir og harmþrungna þrá eftir hinum elskaða eða elskuðu.

Antonía Hevesi píanóleikari er fædd í Ungverjalandi og útskrifaðist úr F.Liszt- tónlistarakademíunni í Búdapest með MA-gráðu í kórstjórn og sem framhaldsskólakennari í söng og hljómfræði. Einnig stundaði hún orgelnám við Hochschule für Musik und darstellende Kunst in Graz í Austurríki hjá Otto Bruckner. Hún hefur haldið fjölda tónleika sem orgelleikari og píanómeðleikari víðs vegar í Evrópu og Kanada. Hún hefur tekið þátt í meistaranámskeiðum í píanóundirleik og söng og spilað inn á geisladiska. Frá því í ágúst 2002 hefur Antonía verið listrænn stjórnandi og píanóleikari hádegistónleikaraðar Hafnarborgar og hefur hún ennfremur komið fram á flestum hádegistónleikum Íslensku Óperunnar frá árinu 2009. Hún var ein af stofnendum Óp-hópsins. Á undanförnum árum hefur hún tekið þátt í uppfærslum á 30 óperum, með Norðurópi, Litla Óperukompaníinu, ÓP- hópnum og hjá Íslensku Óperunni. Hún er virkur píanó-og orgelmeðleikari í íslensku tónlistarlífi og kemur reglulega fram í tónleikum með einsöngvurum, kammerhópum og kórum.

Guðbjörg R. Tryggvadóttir sópran, lauk burtfararprófi auk söngkennaraprófs frá Söngskólanum í Reykjavík. Aðalkennarar hennar voru Magnús Jónsson og Þuríður Pálsdóttir. Framhaldsnám stundaði Guðbjörg í Kaupmannahöfn hjá Prófessor André Orlowitz. Síðustu ár hefur Guðbjörg æft undir leiðsögn Kristjáns Jóhanssonar og Antoniu Hevesi. Guðbjörg starfaði með Kór Íslensku Óperunnar frá 1994 til 2002 og tók þátt í flestum uppfærslum Íslensku óperunnar á því tímabili. Guðbjörg hefur víða komið fram sem einsöngvari, bæði hérlendis og erlendis. Auk nokkurra einsöngstónleika síðustu ár kom Guðbjörg fram á hádegistónleikum Kristjáns Jóhannssonar í Hafnarborg og á sýningu Ragnars Kjartanssonar í Listasafni Reykjavíkur.

Guðmundur Karl Eiríksson er Sunnlendingur í húð og hár en hann á ættir sínar að rekja til Birtingaholts, Vorsabæjar og Vestmannaeyja. Hann er sonur Eiríks Ágústssonar og Olgu Guðmundsdóttur, garðyrkjubænda í Silfurtúni, Flúðum og langafabarn organistans og tónskáldsins Sigurðar Ágústssonar. Guðmundur lauk framhaldsprófi í söng frá Söngskóla Reykjavíkur þar sem hann lærði hjá Garðari Thor Cortes. Einnig stundaði hann nám í Söngskóla Sigurðar Demetz undir leiðsögn Kristjáns Jóhannssonar. Hann lauk mastersdiplómanámi á Ítalíu undir leiðsögn baritónsins Renato Bruson frá Accademia Renato Bruson. Guðmundur hefur komið fram á tónleikum hérlendis sem og á Ítalíu. Hann hefur einnig tekið þátt í óperuuppfærslum en hann fór með hlutverk Schaunard í La bohème á Rimini undir stjórn Joseph Rescigno. Einnig fór hann með aðalhlutverkið, hlutverk Þórs, í Þrymskviðu eftir Jón Ásgeirsson.

Tónleikarnir fara fram innan tónleikaraðarinnar Sígildir sunnudagar í Hörpu 2019 – 2020.

Dagskrá Sígildra sunnudaga veturinn 2019 – 2020

Dagskrá Sígildra sunnudaga veturinn 2019 – 2020

September 2019

Október 2019

Nóvember 2019

Desember 2019

Janúar 2020

Febrúar 2020

Mars 2020

Apríl 2020

Maí 2020