x checkmark sr arrow-right brouchure calendar check clock close compass conference download easel epal facebook food-and-shopping food fullscreen grid halls harpa-icon harpa sinfo instagram leaf like listi magnify mail menu minify minus move music opera pictures play plus qoute recording search select-alt select shopping simple-arrow-left simple-arrow-right sitemap telephone ticket twitter youtube spotify snapchat linkedin youtube

Álfheiður Erla Guðmundsdóttir

Sumarserían - Velkomin heim

Sópransöngkonan Álfheiður Erla Guðmundsdóttir  flytur heillandi barokkdagskrá ásamt hljóðfæraleikurunum Pétri Björnssyni á fiðlu, Steineyju Sigurðardóttur á selló og Halldóri Bjarka Arnarsyni á sembal.

Aðgangur á tónleikana er ókeypis og öll velkomin.

Um Álfheiði Erlu

Álfheiður Erla stundar mastersnám í Hanns Eisler tónlistarháskólanum í Berlín þaðan sem hún lauk bakkalárnámi með hæstu einkunn vorið 2018. Hún hefur tekið þátt í fjölmörgum meistaranámskeiðum hjá heimsþekktum einsöngvurum svo sem Anne Sofie von Otter, Véronique Gens og Emma Kirkby og var á síðasta ári valin til þátttöku í hinni virtu Academy Orsay-Royaumont þar sem ungu tónlistarfólki býðst að kafa í heim ljóðasöngsins ásamt þekktum söngvurum og píanóleikurum (Christoph Pregardien, Veronique Gens, Ulrich Eisenlohr og fleiri).  Árið 2019 tók  hún einnig þátt í meistaranámskeiði hjá Renée Fleming í Carnegie Hall þar sem nýjar leiðir í flutningu og framsetningu ljóðasöngs voru kannaðar en þátttakendur námskeiðsins munu koma fram á tónleikum í Carnegie Hall á næsta ári.

Álfheiður kemur reglulega fram á tónleikum á Íslandi og í Þýskalandi og hefur lagt mikla áherslu á flutning þýskra og norrænna ljóðasöngva frá rómantíska tímabilinu. Hún er þegar farin að hasla sér völl á óperusviðinu, þreytti frumraun sína í Staatsoper Berlín í titilhlutverki barnaóperunnar Mjallhvít (Schneewittchen) eftir Wolfgang Mitterer í mars 2019 og fór síðar sama ár með hlutverk Papagenu í Töfraflautu Mozarts, einnig í Staatsoper Berlín. Hún kom fram sem einsöngvari í óratoríu eftir Scarlatti á barokkdögum Staatsoper Berlín í nóvember 2019 og var valin til þátttöku í óperustúdíói óperunnar í Thüringen veturinn 2019 – 2020.

Sumarserían Velkomin heim fer fram í júlí 2020 í Hörpu. Ungt íslenskt tónlistarfólk kemur fram á þrennum tónleikum sem fram fara kl. 17 á laugardögum í Hörpuhorni og í Flóa. Viðfangsefnin eru margbreytileg og metnaðarfull, sprúðlandi barokktónlist, splunkunýir ljóðasöngar og hyldjúpur djassspuni af dýrustu sort. Fram koma Dúplum Dúó þann 11. júlí, Álfheiður Erla Guðmundsdóttir ásamt tríói þann 18. júli og Sölvi Kolbeinsson og Magnús Trygvason Eliassen þann 25. júlí.

Sumarserían Velkomin heim er samstarfsverkefni FÍT (Félags íslenskra tónlistarmanna) og Hörpu.

Sumarserían Velkomin heim 2020

11. júlí kl. 17 – Dúplum Dúó – Björk Níelsdóttir og Þóra Margrét Sveinsdóttir

18. júlí kl. 17 – Álfheiður Erla Guðmundsdóttir

25. júlí kl. 17 – Sölvi Kolbeinsson ásamt Magnúsi Trygvasyni Eliassen