x checkmark sr arrow-right brouchure calendar check clock close compass conference download easel epal facebook food-and-shopping food fullscreen grid halls harpa-icon harpa sinfo instagram leaf like listi magnify mail menu minify minus move music opera pictures play plus qoute recording search select-alt select shopping simple-arrow-left simple-arrow-right sitemap telephone ticket twitter youtube spotify snapchat linkedin youtube

70 ára afmælistónleikar Sinfóníuhljómsveitar Íslands

Mahler og Sibelius

Í mars 2020 verða 70 ár liðin frá því að Sinfóníuhljómsveit Íslands hélt sína fyrstu tónleika. Af því tilefni verður efnt til hátíðartónleika þar sem hljóma stórvirki eftir Sibelius og Mahler, en einnig sjaldheyrt verk eftir Pál Ísólfsson sem var frumkvöðull í íslensku tónlistarlífi og einn helsti hvatamaður þess að Sinfóníuhljómsveitin var stofnuð á sínum tíma. Úr myndabók Jónasar Hallgrímssonar er sérlega áheyrileg og skemmtileg leikhústónlist, samin við leikgerð sem Halldór Laxness gerði úr sögum og ljóðum Jónasar á hundrað ára ártíð listaskáldsins góða árið 1945.

Fáir kunnu betur listina að semja fyrir stóra sinfóníuhljómsveit en Gustav Mahler. Fyrsta sinfónía hans var metnaðarfull frumraun og upphafstaktar hennar eru að mati tónlistarrýnis The Guardian „eitt innblásnasta augnablik í gjörvallri sinfónískri tónlist 19. aldar“. Í verkinu hljómar einnig meðal annars glaðvær sveitatónlist og sorgarmars sem byggður er á laginu Meistari Jakob. Lokataktarnir eru með því stórfenglegasta sem gert hefur verið í sinfónískri tónlist fyrr og síðar.

Hinn ítalski Augustin Hadelich hefur á síðustu árum skipað sér í fremstu röð fiðluleikara á heimsvísu. Tímaritið Musical America útnefndi hann hljóðfæraleikara ársins 2018 en skömmu áður hlaut hann sín fyrstu Grammy-verðlaun. Sumarið 2018 kom hann líka í fyrsta sinn fram á tónlistarhátíðinni víðfrægu í Salzburg og lék þar einmitt konsert Sibeliusar. Hadelich leikur á ómetanlega Stradivarius-fiðlu frá árinu 1723, sem komst í heimsfréttirnar fyrir um áratug þegar fyrri eigandi hennar gleymdi henni í leigubíl í New York – en strangheiðarlegur bílstjórinn skilaði henni næsta dag.

Um tónsprotann heldur hin finnska Eva Ollikainen, sem vakti feykilega athygli fyrir glæsilega tónleika með Sinfóníuhljómsveit Íslands í febrúar 2019 og var umsvifalaust ráðin til að stjórna tvennum tónleikum á þessu starfsári.

EFNISSKRÁ
Páll Ísólfsson Úr myndabók Jónasar Hallgrímssonar
Jean Sibelius Fiðlukonsert
Gustav Mahler Sinfónía nr. 1

HLJÓMSVEITARSTJÓRI
Eva Ollikainen

EINLEIKARI
Augustin Hadelich

Tónleikakynning í Hörpuhorni » 5. mar. kl. 18:00