x checkmark sr arrow-right brouchure calendar check clock close compass conference download easel epal facebook food-and-shopping food fullscreen grid halls harpa-icon harpa sinfo instagram leaf like listi magnify mail menu minify minus move music opera pictures play plus qoute recording search select-alt select shopping simple-arrow-left simple-arrow-right sitemap telephone ticket twitter youtube spotify snapchat linkedin youtube

10 ára afmælishátíð Nótunnar, uppskeruhátíðar tónlistarskólanna

NÓTAN – uppskeruhátíð tónlistarskóla fagnar 10 ára afmæli sínu í ár en Nótan var fyrst haldin árið 2010 og hefur verið árlegur viðburður síðan. Haldið verður upp á afmælið með pomp og pragt í Hörpu sunnudaginn 29. mars 2020.

Í Eldborg verður boðið upp á röð tónleika frá kl. 11 til 15 þar sem fram koma tónlistarnemendur hvaðanæva af landinu, á öllum aldri og öllum stigum tónlistarnámsins. Á afmælisárinu er sjónum sérstaklega beint að samspili og því hafa hverskonar hljómsveitar- og hópatriði fengið boðskort í afmælisveisluna!

Samhliða tónleikaröðinni fara fram tónlistarsmiðjur í austurhlið Hörpu frá 11 – 16 þar sem þátttakendur skapa og æfa sérstakt tónverk í tilefni 10 ára afmælisins en verkið verður flutt á lokaathöfn afmælishátíðarinnar kl. 16:00 í Eldborg. Gunnar Ben, dósent og fagstjóri skapandi tónlistarmiðlunar í Listaháskóla Íslands, mun stýra tónverkasmíðinni.

Í samstarfi Nótunnar og Sinfóníuhljómsveitar áhugamanna verða sérstakir konserttónleikar í Hörpuhorni á 2. hæð þar sem tónlistarnemendur, sem hafa áhuga á að spila einleik með Sinfóníuhljómsveit áhugamanna, munu stíga á stokk og flytja konsertkafla (eða sambærilegt verk). Oliver Kentish, stjórnandi hljómsveitarinnar, mun velja þá heppnu úr hópi flytjenda sem fá að leika einleik með hljómsveitinni á næsta starfsári hennar.

Með lúðrakalli Nótunnar verður blásið til lokaathafnar afmælishátíðarinnar í Eldborg kl. 16:00 þar sem Sinfóníuhljómsveit tónlistarskólanna mun koma fram, afmælisbarnið ávarpað og sjóðheitt afmælistónverk Nótunnar frumflutt af þátttakendum!

  • Tónleikaröð í Eldborg kl. 11 – 15
  • Konsertveisla í Hörpuhorni kl. 11 – 14
  • Tónlistarsmiðjur í Austurhlið kl. 11 -16
  • Lokaathöfn afmælishátíðar í Eldborg kl. 16 – 17