ASA tríó og Jóel Pálsson - Múlinn Jazz­klúbbur

Jóel Pálsson, saxófónn
Andrés Þór Gunnlaugsson, gítar
Agnar Már Magnússon, hammond
Scott McLemore, trommur

ASA Tríó ásamt saxófónleikaranum Jóel Pálssyni stígur á stokk og leikur efni af plötu sem þeir félagar gáfu út í fyrra. Platan nefnist ‚Another Time‘ og var hljóðrituð snemma árið 2020 þegar allt lá í dvala í samfélaginu. Tónlistin samanstendur af verkum eftir alla fjóra meðlimi hljómsveitarinnar og eru sérstaklega samin fyrir þetta verkefni. Áhrifin koma víðsvegar að, allt frá Indí skotnum lagrænum ópusum, ágengum módalverkum, Fönkblúsuðum Búgalúskotnum lögum til meginstefnujazztónsmíða með miðjarðarhafsblæ og margt þar á milli.
ASA Tríó hefur verið starfrækt frá árinu 2005 og hefur gefið út tvo hljómdiska í eigin nafni auk þess að gefa út nokkrar hljómleikaútgáfur sem eru aðgengilegar á stafrænu formi á heimasíðu tríósins. Tríóið skipa gítarleikarinn Andrés Þór, Agnar Már Magnússon orgel- og hljómborðsleikari og Scott McLemore trommuleikari, þeim til fulltingis er svo saxófónleikarinn Jóel Pálsson sem ætti að vera tónlistaráhugafólki að góðu kunnur. Jóel hefur verið atkvæðamikill í íslensku tónlistarlífi um árabil og gefið út fjölmarga hljómdiska sem hafa hlotið ótal viðurkenninga.